سەردێڕ:

پنتاگۆن هۆکاری کوشتنی قاسم سولەیمانی ئاشکرادەکات

فۆتۆ: 
2020-07-08

25890 جار خوێندراوەتەوە

وەزارەتى بەرگرى ئەمریکا (پنتاگۆن) رایگەیاند، قاسم سولەیمانى فەرماندەى پێشووی سوپاى قودسى ئێران پلانى هێرشکردنە لەسەر بەرژەوەندییەکانى ئەمریکا و چەند دەوڵەتێکى تری داڕشتووە پێش ئەوەى لەلایەن ئەمریکاوە بکرێتە ئامانج و بکوژرێت.

ئەمڕۆ چوارشەممە، بەرپرسێک لە وەزارەتى بەرگرى ئەمریکا (پنتاگۆن) بە کەناڵى حوڕەى راگەیاندووە، "کوشتنى سولەیمانى خزمەتکردن بووە بە سەقامگیرى ناوچەکە و دەستهەڵگرتنى تاران لە تێکدانى ئاسایش و ئارامى وڵاتانى دراوسێى"، وتوشیەتى، "کردنە ئامانجى لەلایەن ئەمریکاوە لەچوارچێوەی ستراتیژى کردنە ئامانجى تیرۆریستان بووە لە جیهاندا".

هاوکات، وتەکانى ئەو بەرپرسەى پنتاگۆن پاش قسەکانى ئاگنیس کالامارد بڕیاردەرى تایبەتى نەتەوەیەکگرتووەکان پەیوەست بە لەسێدارەدان و کوشتن لەدەرەوەى یاسا دێت، کە وتبووى پرۆسەى کوشتنى قاسم سولەیمانى نایاسایى بووە.

رۆژى ٣ى کانوونى دووەمى ئەمساڵ، لەکاتى گەیشتنى بەفرۆکەخانەى بەغدا، قاسم سولەیمانى فەرماندەى پێشووی سوپاى قودسى ئێران و ئەبو مەهدى موهەندیس جێگرى پێشووی فەرماندەى هێزەکانى حەشدى شەعبى لەلایەن فڕۆکەیەکى بێفڕۆکەوانى ئەمریکیەوە کرانە ئامانج و هەردووکیان کوژران.