سەردێڕ:

ژنە بەرگدرووەکانی داعش دەستگیرکران

فۆتۆ: 
2020-07-08

17628 جار خوێندراوەتەوە

هێزێکى سەر بە ئاژانسى هەواڵگرى لە وەزارەتى ناوخۆى عێراق رایگەیاند، دوو ژنیان لەنێو کەمپى ئاوارەکانى لەیلان لە کەرکوک دەستگیرکردووە کە هەردووکیان داواکراون لەلایەن دادگاوە و بەرگدرووی داعش بوون.

وەزارەتى ناوخۆى عێراق لە بەیاننامەیەکدا رایگەیاند، بەپێى هەندێک زانیارى وردى هەواڵگرى، تیمەکانى وەزارەتەکە توانیویانە دوو ژن لەنێو کەمپى لەیلان لەپارێزگاى کەرکوک دەستگیربکەن، کە بەپێى ماددەى ٤ى تیرۆر لەلایەن دادگاوە داواکراون و هەر بەپێى بەیاننامەکە، پاش لێکۆڵینەوەى سەرەتایى لەگەڵ ئەو دوو ژنەدا، دانیان بەوەدا ناوە کە ئەندامى رێکخراوى داعش بوون و موبایەعەیان بە ئەمیرەکەیان داوە و کاریشیان دوورینى جل و بەرگى ئەفغانى بووە بۆ چەکدارەکانى ئەو رێکخراوە.

هەر لەبەیاننامەکەى وەزارەتى ناوخۆى عێراقدا هاتووە، هێزەکانى سەر بەوەزارەتەکەیان ٦٢ گوللـە تۆپى (١٥٥ ملم)ى نەمساویان لە دەوروبەرى ناحیەى یایجى سەر بەپارێزگاى کەرکوک دۆزیوەتەوە، کە پاشماوەى چەکدارەکانى داعشن و بۆ کاتى پێویست لەژێر زەویدا شاردراونەتەوە.