سەردێڕ:

تورکیا لەبارەی هێرشەکانەوە وەڵامی عێراقی دایەوە

فۆتۆ: 
2020-07-06

17157 جار خوێندراوەتەوە

وەزارەتی دەرەوەی تورکیا لە وەڵامی حکومەتی عێراقدا رایگەیاند، "تورکیا لە چوارچێوەی یاسا نێودەوڵەتییاکاندا بە مافی رەوای خۆی دەزانێت، لە بەرامبەر هەر چالاکییەکی تێکدەرانەدا کە سەرچاوەکەی لە عێراقەوە بێت بەرگری لە خۆی بکات."

حامی ئاکسۆی وتەبێژی وەزارەتی دەرەوەی تورکیا لە وەڵامی راگەیەندراوەکانی هەردوو سەرۆکایەتی وەزیران و وەزارەتی دەرەوەی عێراق لەبارەی هێرشەکانی تورکیا بۆسەر هەرێم بڵاویانکردەوە، رایگەیاند، "لە كاتى خۆيدا وەڵامى پێويستمان داوەته‌وه‌ بە لايەنەكانى عێراق لە بەرامبەر ئەو لێدوانانەيان كه‌ لە دژى ئۆپەراسيۆنەكانى چنگی پڵنگ و چنگی هەڵۆ داویانە، كە بۆ سەر پەكەكە لە عێراق بەڕێوه‌دەچێت، لە ئێستاشدا لەسەر ئەم بابەتە لەلايەن لايەنە عێراقييەكانەوە روونكردنەوەى نوێ و بێبنەما دێت".

ئاماژەی بەوەشکرد، "جارێكى ديكە ئەوە بەبیردەهێنینەوە كە ئامادەين بۆ هەماهەنگى لە بەرەنگاربوونەوەى هاوبەش لە دژى پەكەكە كە هەڕەشه بۆ سەر ئاسايش و سەروەرى عێراق دروستدەكات."

باسی لەوەشکرد، "تاوەكو ئەم چاوەڕوانييانەمان پێشوازى لێنەكرێت، توركيا لە دژى هەر چالاكييەكى تێكدەرانه‌ كە سەرچاوەكەی لە خاكى عێراقەوە بێت لە چوارچێوەی یاسا نێودەوڵەتیەکان بە مافی رەوای خۆی دەزانێت رێکاری پێویست بگرێتەبەر."

پێشتر، حکومەتی عێراق رایگەیاند، "حکومەتی تورکیا بە بەرپرسیاری هەر زیانێکی ماددی و گیانی دەزانن لە هێرشەکانیاندا بۆ سەر خاکی وڵاتەکە، وتیشی، "پێویستە دەستبەجێ تورکیا هێرشەکانی بووەستێنێت."

بە بیانوی هەبوونی پارتی کرێکارانی کوردستان (پەکەکە)، وەزارەتی بەرگری تورکیا دوو ئۆپەراسیۆنی لەژێر ناوەکانی چنگی پڵنگ و چنگی هەڵۆ بۆ ناو خاکی کوردستان دەستپێکرد و بەوهۆیەوە بەشێک لە ناوچە سنورییەکانی هەرێم زیانی گیانی و ماددیان بەرکەوت.