سەردێڕ:

ئاماری شەش مانگی پێشێلکاری بەرامبەر رۆژنامەنوسان ئاشکراکرا

فۆتۆ: 
2020-07-05

1099 جار خوێندراوەتەوە

سه‌نته‌ری میترۆ ئامارەكانی شەش مانگی پێشێلكاری بەرامبەر ئازادیی رۆژنامەنوسی بڵاوكردەوە کە تیایدا ٩٨ جۆری پێشێلکاری بەرامبەر ٧٢ رۆژنامەنوس و دەزگای راگەیاندن تۆمارکراوە و لەو ژمارەیەش پێنج رۆژنامەنوسیان ژن بوون، دەشڵێت، "كۆرۆنا كراوەتە پاساوێكی تر بۆ بەرتەسككردنی ئازادی رۆژنامەنوسی."

سه‌نته‌ری میترۆ بۆ داكۆكی كردن له‌ مافی رۆژنامه‌نوسان ئامارەكانی شەش مانگی پێشێلكاری بەرامبەر ئازادیی رۆژنامەنوسی بڵاوكردەوە، بەپێی ئامارەكان، لە ١ی كانونی دووەم بۆ ٣٠حوزەیرانی ٢٠٢٠،  ٩٨ جۆری پێشێلكاری بەرامبەر ٧٢ رۆژنامەنوس و دەزگای راگەیاندن تۆمار كراوە، لەو ژمارەیەش پێنج رۆژنامەنوس ژن بوون.

لە ئامارەکەدا، ٥٣ حاڵەتی رێگری لە روماڵكردن، پێنج حاڵەتی هەڕەشە، حەوت حاڵەتی دەستبەسەركردن لە دەرەوەی چوارچێوەی یاسای رۆژنامەگەری، هەشت هێرش و لێدان، نۆ حاڵەتی دەستبەسەركردن بە بێ فەرمانی دادگا، ١١ حاڵەتی دەستبەسەركردن و شكاندنی كەلوپەلی رۆژنامەنوسان، سێ هێرشی ئەلیكترۆنی، دوو كەیسی هەراسانکردنی كچان و ژنان لەناو دەزگاكانی میدیا تۆمارکراوە.

لەلایەکی دیکەوە، نەزاکەت حسێن سکرتێری لیژنەی داکۆکی لە مافی رۆژنامەنوسان لە سەندیکای رۆژنامەنوسانی کوردستان بە ئێن ئاڕ تی راگەیاند، "لەماوەی ئەم شەش مانگەدا هەڵکشانێکی زۆر لە پێشێلکارییەکاندا هەبووە، بەشێکی دەگەڕێتەوە بۆ قەدەغەی هاتوچۆ کە بووەهۆی دروستکردنی رێگرییەکی زۆر لەبەردەم رۆژنامەنووسان، بەشێکی دیکەشی بەهۆی خۆپیشاندانەکانی ماوەی رابردوو و گرفتە سیاسیەکانەوە دوچاری رۆژنامەنوسان هاتووە."

بەپێی ئاماری سەندیکای رۆژنامەنوسان لە هەرێمی کوردستاندا و لە ٢٠١٩دا، ٦٦ پێشێلکاری بەرامبەر بە ١٥١ رۆژنامەنوس ئەنجامدراوە و کەناڵی ئێن ئاڕ تی و رۆژنامەنوسەکانیشى زۆرترین پێشێلکارییان بەرامبەر کراوە کە ٢٧ حاڵەت بووە.