سەردێڕ:

​رۆژنامەیەک هاوکاریی هەواڵگریی چەند لایەنێکی هەرێم بۆ تورکیا ئاشکرادەکات

فۆتۆ: 
2020-07-03

42670 جار خوێندراوەتەوە

رۆژنامەی العەرەب رایگەیاند، تورکیا بابەتی قەرزەکانی لەگەڵ حکومەتی هەرێمدا کردووەتەوە، تاوەکو هەرێم لە لایەنی هەواڵگری و دیاریکردنی شوێنی پارتی کرێکارانی کوردستاندا هاوکارییان بکەن

ئەمڕۆ هەینی، رۆژنامەی العەرەب لە زاری چەند سەرچاوەیەکەوە بڵاویکردەوە، "چەند لایەنێکی سیاسی هەرێمی کوردستان هاوکاری هەواڵگریان پێشەکەشی تورکیا کردووە، پێش ئەوەی تورکیا ئۆپەراسیۆنی چنگی پڵنگ لە دژی پارتی کرێکارانی کوردستان (پەکەکە) لە ناوچە شاخاوییەکانی هەرێمی کوردستان دەستپێبکەن."

ئاماژە بەوەشکراوە، "ئەنقەرە داوایەکی پێشکەش بە حکومەتی هەرێمی کوردستان کردووە، کە لە رووی ئابورییەوە هاوکارییان دەکەن، لەبەرامبەردا حکومەتی هەرێم زانیارییان لەسەر شوێنی پەکەکە پێبدەن."

رۆژنامەکە ئەوەشی خستووەتەڕوو، "سەرچاوەکەمان لە وەڵامی کۆتایی دەسەڵاتدارانی هەرێم بۆ تورکیا دڵنیا نییە، بەڵام سەرچاوەکە زانیویەتی، پێش ئەوەی تورکیا دەستبکات بە ئۆپەراسیۆنی چنگی پڵنگ بابەتی قەرزەکانی لەگەڵ هەرێمی کوردستاندا زیندوو کردووەتەوە."

باسی لەوەشکردووە، "رەجەب تەیب ئەرۆغان سەرۆکی تورکیا هەوڵدەدات سود لەو دەرفەتە وەربگرێت کە بەهۆی کەمبوونەوەی نرخی نەوتەوە عێراق و هەرێمی کوردستانی تێکەوتوون."

ئەوەش دوایی ئەوەدێت، لە ١٧ی مانگى حوزەیرانى ٢٠٢٠وە تورکیا ئۆپراسیۆنی چنگی پڵنگی بۆ سەر چەند ناوچەیەکی هەرێم دەستپێکردووە و بەردەوام بە فڕۆکەی جەنگی هێرش دەکاتە سەر ناوچە و گوندەکانی هەرێم.