سەردێڕ:

دوو کەس بە چەک ڕوبەڕوی پۆلیسی هەولێر بوونەوە و دەستگیرکران

فۆتۆ: 
2020-07-03

29805 جار خوێندراوەتەوە

پۆلیسی هەولێر رایگەیاند، شەوی رابردوو لەناو بازاڕی قەیسەری شارەکەدا، دوو کەس بە ئاراستەی پێچەوانە ئۆتۆمبێلیان لێخوڕیوە و تەقەیان لە پۆلیس کردووە و دواتر دەستگیرکراون.

بەڕێوەبەرایەتی پۆلیسی هەولێر لە راگەیەندراوێکدا ئاماژەی بەوەکردووە، "دوێنێ كاتژمێر٢:٣٠ شەو لەناو بازاڕی قەیسەری، لە كاتی ئەركی فەڕمی خۆیان بۆ پاراستنی ئەمنیەتی شوێنەکە لەگەڵ دوو تۆمەتبار بە ناوەكانی (ح.ل.ح) و (م.ف.ا) روبەڕوبوونەوە، كە پێشینەی تاوانیان هەبوو."

دەشڵێت، "سەرەڕای زامداربوونیان، ئەفسەرێك و دوو كارمەندی پۆلیس توانییان بەرەنگاری دوو تۆمەتبارەكە ببنەوە و بە هاوبەشی لەگەڵ تیمەكانی پۆلیسی هەولێر دەستگیریان بكەن."

باسی لەوەشکردووە، تۆمەتبارەكان بە ئاڕاستەی پێچەوانە ئۆتۆمبێلیان لێخوڕیوە و بە چەكی جۆری كڵاشینكۆف "٧٥"ی و دەمانچەیەكی جۆری (تارق) تەقەیەكی زۆریان كردبوو و روبەڕوی پۆلیس ببوونەوە، بەڵام هێزەكانی پۆلیسی هەولێر، دەستبەجێ لێیان هاتنەدەست و وێڕای دەستگیركردنی تۆمەتباران، دەستبەسەر چەكەكان و ئۆتۆمبێلەكەشیاندا گیرا."

ئەوەش هاتووە، ئێستاش تۆمەتباران بەپێی ماددە ٣١/٤٠٥ لە یاسای سزادان، بەندكراون و روبەڕوی یاسا كراونەتەوە.
Image may contain: one or more people and beard