سەردێڕ:

عێراق.. ئەنجامی ئۆپەراسیۆنی دووەمی دژ بە داعش ئاشکراکرا

فۆتۆ: 
2020-06-06

1783 جار خوێندراوەتەوە

وتەبێژی فەرماندەی گشتیی هێزە چەکدارەکانی عێراق رایگەیاند، لە قۆناغی دووەمی ئۆپەراسیۆنی پاڵەوانەكانی عێراق كە لە پێنج میحوەری كەركوك ئەنجامدرا، ٧٣٨ کیلۆمەتر چوارگۆشە لە چەکدارانی داعش پاککراونەتەوە.

یەحیا رەسول وتەبێژی فەرماندەی گشتیی هێزە چەکدارەکانی عێراق رایگەیاند، لەمیانی ئۆپەراسیۆنی دووەمدا لە ژێر ناوی ئۆپەراسیۆنی پاڵەوانەکانی عێراق، تا ئێستا هێزە ئەمنییەکان ٧٣٨ کیلۆمەتر چوار گۆشەیان لە سنوری پارێزگاکانی نێوان کەرکوک و سەڵاحەددین لە چەکدارانی داعش پاککردووەتەوە و ژمارەیەک چەکداریش کوژراون و ژمارەیەک کەسی داواکراویش دەستگیرکراون.

ئاماژەی بەوەشکردووە، ژمارەیەک حەشارگەی ئەو چەکدارانەش لە ناوچەکە خاپورکران و دەستیش بەسەر ژمارەیەک چەک و بڕێکی زۆری تەقەمنییدا گیراوە.

باسی لەوەشکردووە، لە ئۆپەراسیۆنەکەدا، گورزی کوشندە لە چەکدارانی داعش لە ناوچەکەدا وەشێندراوە و هێزە ئەمنییەکان لە ئۆپەراسیۆنەکانیاندا بەردەوامن لە راوەدوونانی چەکداران لە سنوری پارێزگاکانی نێوان کەرکوک و سەڵاحەددین.

ئەوەشی خستووەتەڕوو، لەئێستادا دەزگای هەواڵگریی بە وردی چاودێری جمووجۆڵی ئەو چەکدارانەی دیکەی داعش دەکات کە لە سنوری پارێزگای دیالەن.

رۆژی سێشەممەی رابردوو قۆناغی دووەمی ئۆپەراسیۆنی پاڵەوانەكانی عێراق، بە ئامانجی راوەدوونانی چەکدارانی داعش لە پێنج میحوەری باشوری رۆژئاوای كەركوك دەستیپێكرد، ئامانج لە ئەنجامدانی ئۆپەراسیۆنەكەش، دەستگیركردنی كەسانی داواكراو و راوەدوونانی چەکدارانی داعشە، بۆ ئەوەی ئاسایش و سەقامگیری لە ناوچەکە پتەوتر بێت.

 شارەزایانی ئەمنی ئاماژە بەوەدەکەن، ئەو ئۆپەراسیۆنە لە کاتێکدا ئەنجامدراوە كە هێرشی داعش بۆسەر هێزە عێراقییەکان لە سنوری پارێزگاکانی کەرکوک، سەڵاحەددین، دیالە، نەینەوا و ئەنبار زیادیکردووە.