سەردێڕ:

سەرکردایەتی پارتی لە کەرکوک: ئاگاداری گرتوخانەی نهێنیی یەکێتی نین

فۆتۆ: 
2020-05-21

25752 جار خوێندراوەتەوە

ئەنجومەنی سەرکردایەتی کەرکوك – گەرمیانی پارتی دیموكراتی كوردستان رایگەیاند، ئەوان و حکومەتی هەرێمیش بە هیچ شێوەیەک ئاگاداری گرتوخانەی "نهێنیی" یەکێتی نین و دادگا بێئاگایە لەو گیراوانەی چەند ساڵە لە گرتوخانەی ئەو حزبەدا ماونەتەوە.

ئەنجومەنی سەرکردایەتی کەرکوك – گەرمیانی پارتی دیموكراتی كوردستان لە راگەیەندراوێکدا ئاماژەی بەم چەند خاڵەی خوارەوە کردووە:

یەکەم: وەک پارتی دیموکراتی کوردستان سنوری کەرکوك - گەرمیان بە هیچ شێوەیەک ئاگادارنەبووینە یەکێتیی نیشتمانی ئەم جۆرە گرتووخانانەی هەیە و ئاگاداری هەبوونی ئەو گیراوانە لای هێزەکانی سەر بە یەکێتی نەبووینە.

دووەم: پەیوەندیمان بە حکومەتی هەرێمی کوردستانەوە کردووە، بۆمان دەرکەوت حکومەتی هەرێمی کوردستان بێ ئاگایە لە گرتووخانە نهێنییەکانی یەکێتیی نیشتمانی، هیچ یەکێک لەو گیراوانە رادەستی دامەزراوەی دادوەریی هەرێم نەکراوە.

واتە، دادگا بێ ئاگایە لە گرتنی ئەم گیراوانە و ئەم چەند ساڵە بەشێوەیەکی نایاسایی لە گرتووخانەی نهێنیدا ماونەتەوە، ئەمەش بابەتێکە پێویستە لێپێچینەوە لەو کەسانە بکرێت کە لێی بەرپرسیارن و ناکرێت کەمتەرخەمی بەرامبەر ئەوە بکرێت کە حزبێک لە سەروی یاسا و لە سەروی دەزگا دادوەرییە فەڕمییەکانی هەرێم بێت. هەروەها نابێت هیچ حزبێک گرتووخانەی نهێنیی هەبێت و بەبێ رێکاری دادوەریی روون و فەڕمی هاوڵاتیانیان تێدا زیندانیبکرێن.

سێیەم: سەبارەت بە هەڵوێستی فەڕمی پارتی دیموکراتی کوردستان. پارتی هەمیشە داوای گفتوگۆ و گرتنەبەری هەنگاوی ئەرێنیی کردووە بەمەبەستی نزیککردنەوەی دید و بۆچوونی پێکهاتە جۆراوجۆرەکانی کەرکووک. هەروەها پارتی دیموکراتی کوردستان لە سنوری  کەرکووك - گەرمیان بە هیچ شێوەیەک لە هەبوونی ئەم جۆرە گیراوانە و ھەبوونی گرتوخانەی نھێنی تایبەت بە یەکێتیی نیشتمانی ئاگادارنەبووە، گەڕانەوەی ئەو خەڵکە کە بەبێ فەرمانی دادگا گیرابوون بۆ ناو کەسوکاریان بەر لە جەژنی رەمەزان بابەتێکی گرنگە، زۆر گرنگە ئەو گرتووخانە نهێنییانە دابخرێن و ئەو کەسانەی بوونەتە هۆکاری گرتنی ئەو هاوڵاتیانە لە ماوەی ئەم چەند ساڵەدا لێپێچینەوەیان لەگەڵدا بکرێت.

پارتی دیموکراتی کوردستان هۆشداریدەدات لەو هەڵمەتە مەبەستدارانەی راگەیاندن بۆ ناوزڕاندنی کورد و بڵاوکردنەوەی زانیاریی ناڕاست و بوختانکردن بە پارتی دیموکراتی کوردستان. لە کاتێکدا کە عێراق و تەواوی ناوچەکە بە قۆناغ و دووڕیانی سیاسیی زۆر مەترسیدار و هەستیاردا تێپەڕدەبن، ئەم پرۆسانەی ناشرینكردن و لەكەداركردن و بڵاوکردنەوەی زانیاریی هەڵە و بێ بنەما و نادروست لە ڕاگەیاندندا دەبنە مایەی گرژی و لێکەوتەی وەها کە ئەنجامیان باش نییە. داواش لە گشت دەزگاکانی راگەیاندن دەکەین ئەوپەڕی وردبینی لەو هەواڵانەدا بکەن کە بڵاودەبنەوە، لەبەر ئەوەی هەواڵی ناڕاست و بانگەشەی نەرێنیی راگەیاندن کە بانگەواز بۆ رق و جیاکاری لەنێوان پێکهاتەکانی کەرکووک دەکەن دەبنە مایەی ناکۆکیی کۆمەڵگەیی و ململانێ لە کاتێکدا کە ئێمە بەجددی کار بۆ خۆلادان لەو ململانێیانە لەنێوان پێکهاتە و رۆڵەکانی کەرکووکدا دەکەین.

لە چەند رۆژی رابردوودا، محەمەد عوسمان، لێپرسراوی مەڵبەندی کەرکوکی یەکێتی رایگەیاند، "بڕیارمانداوە هەرچی بەندکراوی عەرەبە لەژێر دەسەڵاتی هێزەکانماندا رادەستی فەرماندەی ئۆپراسیۆنەکانی کەرکوکی بکەین و خۆیان ئازادن چۆن مامەڵەیان لەگەڵ دەکەن."