سەردێڕ:

ئەوقافی سلێمانی: ئەگەر نوێژی جەژن قەدەغەی هاتوچۆ بیگرێتەوە بەڕێوەناچێت

فۆتۆ: 
2020-05-21

32710 جار خوێندراوەتەوە

سەرۆکی لیژنەی فەتوای سلێمانی رایگەیاند، تا ئێستا بڕیاری تایبەت بە بەڕێوەچوونی نوێژی جەژن لە پارێزگای سلێمانیدا نەدراوە و ئەگەر قەدەغەی هاتوچۆ کاتی نوێژی جەژن بگرێتەوە، ئەوا بەڕێوەناچێت.

محەمەد پێنجوێنی، سەرۆکی لیژنەی فەتوای سلێمانی بە ئێن ئاڕ تی راگەیاند، ئەوان لە پارێزگای سلێمانی هیچ بڕیارێکی تایبەتیان لەبارەی بەڕێوەچوون یان بەڕێوەنەچوونی نوێژی جەژن نەداوە و چاوەڕێی لیژنەی باڵای بەرەنگاربوونەوەی کۆرۆنان.

راشیگەیاند، ئەگەر ماوەی قەدەغەی هاتوچۆ کاتی بەڕێوەچوونی نوێژی جەژنی گرتەوە، ئەوا لەژێر فەرمانی وەزارەتی ناوخۆ و لیژنەی باڵای بەرەنگاربوونەوەی کۆرۆنادا، نوێژی جەژن بەڕێوەناچێت.

باسی لەوەشکرد، نوێژی جەژن، نوێژێکی سونەتە و دەکرێت هاوڵاتیان لە ماڵەکانی خۆیانەوە ئەنجامیبدەن.

رۆژی دووشەممەی رابردوو، وەزارەتی ناوخۆی هەرێم رایگەیاند، قەدەغەی هاتوچۆی تەواو لە یەکەم رۆژی جەژنەوە تاوەکو ٧٢ کاتژمێر لە تەواوی پارێزگا و ئیدارە سەربەخۆکاندا جێبەجێدەکرێت.