سەردێڕ:

هەرێم.. ١١ حاڵەتی نوێی توشبوون بە کۆرۆنا تۆمارکرا

فۆتۆ: 
2020-05-20

15143 جار خوێندراوەتەوە

وەزارەتی تەندروستیی هەرێم رایگەیاند، ١١ حاڵەتی نوێی توشبوون بە کۆرۆنا لە هەرێم تۆمارکرا، کە هەشتیان لە پارێزگای هەولێر و سێ حاڵەتی دیکەیان لە پارێزگای سلێمانین.

ئەمڕۆ چوارشەممە، تەندروستیی هەرێم بڵاویکردووەتەوە، "لە بەردەوامی پشکنینەکان و گەڕان بەدوای گومانلێکراوان، هەشت تووشبووی دیکەی ڤایرۆسی کۆرۆنای نوێ COVID-19  لە پارێزگای ھەولێر دەستنیشانکران."

ئاماژەی بەوەشکردووە، توشبوەکان "یەک ئافرەتى تەمەن ٤٥ ساڵ و دوو کچی تەمەن ٢٢ و ١١ ساڵان و چوار کوڕى تەمەن ٢٥ و ٢٢ و ١٤ و ٦ ساڵان کە هەموویان خانەوادەی تووشبووەکەی ئەمڕۆی شاری هەولێرن لە کۆمەڵگای شاوەیس، وە پیاوێکی تەمەن ٤٢ ساڵ کە برای  تووشبووەکەی ئەمڕۆی شاری هەولێرە کە دانیشتووی ھەولێر سیتیە."

وەزارەتی تەندروستیی ئەوەشی راگەیاندووە، "سێ توشبووی دیکە لە پارێزگای سلێمانی دەستنیشانکران، کە دوو ئافرەتی تەمەن ٤٥ و ٢٢ ساڵ و پیاوێكی تەمەن ٢٩ ساڵە، یەک لە تووشبووان بەرکەوتەی تووشبووانی پێشووە و دوو تووشبووەکەی تر نیشانەی نەخۆشییەکەیان ھەیە، هەموویان دانیشتووی ناو شاری سلێمانین."

بەپێی دواین ئاماری وەزارەتی تەندروستیی هەرێم، تا ئێستا ٤٤٢ حاڵەتی توشبوون بە کۆرۆنا لە هەرێمدا تۆمارکراون و لەو ژمارەیەش ٣٨٣ کەسیان چاکبوونەتەوە.