سەردێڕ:

پەیمانگای گەردوونناسی میسری یەکەم رۆژی جەژنی دیاریکرد

فۆتۆ: 
2020-05-20

67960 جار خوێندراوەتەوە

پەیمانگای نیشتیمانیی میسر بۆ توێژینەوەی گەردوونناسی رایگەیاند، بەپێی لێکدانەوەکانیان، رەمەزانی ئەمساڵ ٣٠ رۆژ تەواو دەکات و بەو شێوەیەش، رێککەوتی ٢٤ی ئەم مانگە دەبێتە یەکەم رۆژی جەژنی رەمەزان.

ئەمشەو، پەیمانگای نیشتیمانیی میسر بۆ توێژینەوەی گەردوونناسی لە راگەیەندراوێکدا ئاماژەی بەوەکردووە، بەپێی لێکدانەوەکانیان، لە ئێوارەی ٢٩ی رەمەزاندا ناتوانرێت مانگ ببینرێت، بەڵکو لە ئێوارەی رۆژی ٣٠یەمی رەمەزاندا مانگ دەبینرێت و بەوەش، یەکەم رۆژی جەژنی رەمەزانی ئەمساڵ دەکەوێتە رۆژی یەکشەممە، ٢٤ی ئایاری ٢٠٢٠.

دوێنێش، ناوەندی ئیسلامی بۆ بینینی مانگ رایگەیاند، رۆژی هەینی، ٢٢ی ئەم مانگە ٢٩یەمین رۆژی رەمەزانە و بینینی مانگ ئەستەم دەبێت و بەوەش، مسوڵمانان دەبێت رۆژی ٢٣ی مانگیش کە دەکاتە ٣٠یەمین رۆژی رەمەزان بەڕۆژوو بن.

باسی لەوەشکرد، ئەو وڵاتانەی لە ٢٤ی نیسانەوە دەستیان بە رۆژووگرتن کردووە، ئەوا یەکەم رۆژی جەژنیان دەکەوێتە رێککەوتی ٢٤ی ئەم مانگەوە.

بەپێی کەلتوری ئیسلامی، مسوڵمانان دەبێت لە کۆتایی رۆژەکانی رەمەزاندا مانگ لە ئاسماندا ببینن و پاشان جەژن بگێڕن.