سەردێڕ:

ئەمریکا چین بە دزینی داتای ڤاکسینی کۆرۆنا تۆمەتباردەکات

فۆتۆ: 
2020-05-15

3174 جار خوێندراوەتەوە

وەزیری دەرەوەی ئەمریکا رایگەیاند، هاککەرانی سەر بە حکومەتی چینی هەوڵی دزینی زانیاریی و داتای ڤاکسینی کۆرۆنا دەدات کە وڵاتەکەی پەرەیپێداوە و لە حاڵەتی ئامادەکردندایە.

مایک پۆمپیۆ، وەزیری دەرەوەی ئەمریکا لە راگەیەندراوێکدا ئاماژەی بەوەکردووە، "لە کاتێکدا کە نەتەوەیەکگرتوەکان و هاوپەیمانان سەرقاڵی دۆزینەوەی ڤاکسینی دژە کۆرۆنان بۆ ڕزگارکردنی گیانی هاوڵاتیان، کەچی لەلایەن هاککەرانی وڵاتی چینەوە، هەوڵی هاککردنی زانیارییە تەندروستییەکان دەدرێت."

راشیگەیاند، بە هەماهەنگی لەگەڵ "ئێف بی ئای" پارێزگارییەکی توندتردەکەن تا هاککەران نەتوانن بەمشێوە نایاساییە دزە بە زانیارییە تەندروستییەکان بکەن.

پێشتر، رۆژنامەی نیویۆرک تایمز بڵاویکردەوە، هەریەک لە ئێف بی ئای و دەزگای ئاسایشی ناوخۆی ئەمریکا دەیانەوێت بە تۆمەتی هەوڵدان بۆ هاککردنی زانیارییەکان لەبارەی ڤاکسینی کۆرۆناوە، داوای یاسایی لەسەر گەورەهاککەرانی چین تۆماربکەن.

لەماوەی رابردوودا، دۆناڵد ترەمپ، سەرۆکی ئەمریکا و بەرپرسانی دیکەی ئەو وڵاتە بەرپرسانی چینیان بە شاردنەوەی زانیارییەکان لەبارەی کۆرۆنا تۆمەتبارکرد و جەختیانکردەوە کە ڤایرۆسەکە لە تاقیگەکانی ئەو وڵاتەوە سەریهەڵداوە.