سەردێڕ:

سبەی و دووسبەی موچەی ئەم شوێنانە دابەشدەکرێت

فۆتۆ: 
2020-05-04

150064 جار خوێندراوەتەوە

سەرچاوەیەک لە وەزارەتی دارایی هەرێم رایگەیاند، سبەی سێشەممە موچەی مانگی یەکی ئەمساڵی دیوان و لیواكانی وه‌زاره‌تی پێشمه‌رگه‌ و رۆژی چوارشەممەش موچەی یەکەی ٧٠ و ٨٠ دابەشدەکرێت.

سەرچاوەیەک لە وەزارەتی دارایی هەرێم بە ئێن ئاڕ تی راگەیاند، سبەی سێشەممە، ٥ی ئایاری ٢٠٢٠، موچەی دیوان و لیواكانی وه‌زاره‌تی پێشمه‌رگه و رۆژی چوارشەممە ٦ی ئایار، موچەی‌ یەکەی ٧٠ و ٨٠ دابەشدەکرێت و دابەشکردنی موچەش بەردەوام دەبێت.

دابەشکردنی موچەی مانگی یەکی ئەمساڵ لەکاتێکدایە، رۆژی یەکشەممە، حکومەتی هەرێم رایگەیاند، بەپێی ئەو توانا داراییەی ئێستا لە بەردەستدایە، دەست بە دابەشکردنی موچە دەکرێتەوە.

بەپێی زانیارییەکانی ئێن ئاڕ تی، وەزارەتی دارایی بڕێک پارەی لەبەردەستدایە و بەشی چەند وەزارەتێک دەکات، بەڵام بەهۆی نەهاتنی پارە لە بەغداوە رایگرتبوو و دابەشی نەدەکرد.

لە ناوەڕاستی مانگی رابردوودا، ئەمینداری گشتی ئەنجومەنی وەزیرانی عێراق بە نوسراوی فەڕمی و بەهۆی رادەستنەکردنی ٢٥٠ هەزار بەرمیل نەوتی رۆژانەی هەرێم بە بەغدا، پارەی موچەی فەرمانبەرانی هەرێمی لە لقی هەولێری بانکی ناوەندی عێراق راگرت (بلۆک) کرد و رێگە بە هەرێم نادرێت ئەو پارەیە بۆ دابەشکردنی موچە بەکاربهێنێت و بەو هۆیەوە دابەشکردنی موچە دواکەوتووە.

بەهۆی رادەستنەکردنی ئەو بڕە نەوتەی هەرێم بە بەغدا کە لە کۆتایی ساڵی رابڕدوودا لەسەری رێککەوتبوون، حکومەتی عێراق ناردنی موچەی فەرمانبەرانی هەرێمی راگرتووە، لە چەند ڕۆژی رابڕدووشدا شاندی هەرێم بۆ چارەسەرکردنی ئەو پرسە سەردانی بەغدا کرد و بڕیاریشە ئەمڕۆ شاندێکی دیکەی تەکنیکی هەرێم سەردانی بەغدا بکاتەوە.

ئەو موچەیەی دابەشدەکرێت، موچەی مانگی یەکی ئەمساڵە و فەرمانبەرانیش زیاتر لە ٥٠ رۆژە موچەیان وەرنەگرتووە.

هێرش قادر، هەولێر