سەردێڕ:

تورکیا.. لەماوەی ٢٤ کاتژمێردا زۆرترین ژمارەی توشبوون بە کۆرۆنا تۆمارکراوە

فۆتۆ: 
2020-04-06

7361 جار خوێندراوەتەوە

لە ماوەی ٢٤ کاتژمێری رابردوودا سێ هەزار و ١٣٥ کەس لە تورکیا توشی ڤایرۆسی کۆرۆنا بوون، کە ئەوەش لە سەرەتای بڵاوبوونەوەی ڤایرۆسەکەوە تا ئێستا زۆرترین ژمارەی توشبوونە.

ئەمڕۆ یەکشەممە، فەخرەدین کۆجا وەزیری تەندروستیی تورکیا رایگەیاند، "لە ماوەی ٢٤ کاتژمێری رابردوودا سێ هەزار و ١٣٥ حاڵەتی نوێی توشبوون بە ڤایرۆسی کۆرۆنا تۆمارکراون، کە ئەوەش لە سەرەتای بڵاوبوونەوەی ڤایرۆسەکەوە لە تورکیا بەرزترین رێژەیە".

راشیگەیاندووە، "ژمارەی توشبوونەکان لە تورکیادا لە هەڵکشاندایە، بە جۆرێک لە چوارشەممەی رابردوودا دوو هەزار و ١٤٨ حاڵەت، لە پێنجشەممەی رابردوو دوو هەزار و ٤٥٦ حاڵەت، هەینی رابردوو دوو هەزار و ٧٨٦ حاڵەت و دوێنێش شەممە سێ هەزار و ١٣ حاڵەت تۆمارکراون".

ئەوەش لە کاتێکدایە، تا ئێستا لە تورکیادا ٢٧ هەزار و ٦٩ کەس توشی ڤایرۆسی کۆرۆنا بوون، لەو ژمارەیەش ٥٧٤ کەس گیانیان لەدەستداوە و هەزار و ٤٢ کەسیش چاکبوونەتەوە.

هـ.ئـ