سەردێڕ:

سلێمانى.. وردەکاریی بڕیارەکانى لیژنەى بەرەنگاربونەوەى کۆرۆنا

فۆتۆ: 
2020-04-05

16806 جار خوێندراوەتەوە

لیژنەی باڵای ئۆپراسیۆنەكانی پارێزگای سلێمانی بۆ بەرەنگاربوونەوەی كۆرۆنا كۆبووەوە و چەند بڕیارێکی دەرکرد.

دەقی  بڕیارەکان:

١-هاتوچۆ و ئاڵوگۆڕی گشت كارمەندانی فەرمانگە خزمەتگوزارییەكانی (پشوو نایانگرێتەوە)، بە مۆلیدە ئەهلیەكانیشەوە، لە ئەركی ڕۆژانەیاندا تەنها ماوەی دوو سەعات (٧ تا ٩)ی بەیانی دەبێت، پێویستە بەڵگەنامەی پێویست پیشانبدەن، بەمەرجێك هەموو ڕێنماییە تەندروستی‌ و كارگێڕی‌ و ئارامییەكان جێبەجێ‌بكەن.

٢-كارمەند و ڕۆژنامەوانانی كەناڵەكانی ڕاگەیاندن ڕێگەپێدراو دەبن، بەمەرجێك لەگەڵ باج یان ناسنامەی كەناڵەكەیاندا نووسراوی ڕاسپاردنیان بە ئەركی ڕۆژانەی ڕاگەیاندنكارانەیان هەبێت لەلایەن دەزگاكەیانەوە.

٣-بەپێی لیستی موچە، ڕۆژانە كارئاسانیی بۆ موچەخۆرانی ئەو شوێنانە دەكرێت كە موچە وەردەگرن، بەمەرجێك بەڵگەی فەرمیی پیشانبدەن‌ و پابەندی ڕێنماییە تەندروستی‌ و كارگێڕی‌ و ئارامییەكان بن.

٤-هەموو هێزەكانی پۆلیس‌ و ئاسایش‌ و پۆلیسی هاتوچۆ‌ و لیوای یەكی پاراستنی سلێمانی، بە شێوازێكی نوێ‌‌ و بەپێی دابەشبوونی گەڕەكەكان، لە تیمی هاوبەشدا ئەركی چاودێریكردنی پابەندبوون بە قەدەغەی هاتووچۆوە جێبەجێدەكەن، تەنها پۆلیسی هاتوچۆ مافی لێپێچینەوەی لە شۆفێر و ئۆتۆمبێلەكان هەیە، لەگەڵ هەموو تیمێكدا ڕێبەرێكی تەندروستی بەشدار دەبێت بۆ ڕێنماییكردنی شۆفێر و سەرنشینان.

٥-لە دوای (٤٨) سەعاتی قەدەغەی تەواو، هەموو چالاكییە ئابوریی‌ و بازاڕگەریی‌ و دارایی‌ و عەلوە و یەكەكانی نیشتەجێبوون‌ و سیتیەكان و كۆمپانیاكانی دابەشكاریی‌ و ماركێت‌ و خزمەتگوزاریی ڕۆژانە پێویستەكان, لەلایەن قائمقامیەتی سلێمانی‌ و (یەكە كارگێڕییەكانەوە), بەهاوبەشی لەگەڵ بەڕێوەبەرایەتی چاودێری بازرگانی و بەڕێوەبەرایەتی ئاسایشی ئابوریدا، ڕێكدەخرێنەوە، بەمەرجێك كە پابەندی ڕێنماییە تەندروستی‌ و كارگێڕی‌ و ئارامییەكان بن.

٦-جوڵە و كاروباری دامودەزگا حكومیەكان‌ و كۆمپانیاكانی كەرتی تایبەت لەلایەن پارێزگای سلێمانی‌ و بەڕێوەبەرایەتی كاروباری ناوخۆی پارێزگا و فەرمانگەی پەیوەندیدارەوە ڕێكدەخرێنەوە.

٧-لەدوای (٤٨) سەعاتی قەدەغەی تەواو، پێویستە هەموو هاوڵاتییەك لەكاتی هاتنە دەرەوە و مامەڵەی ڕۆژانەدا، دەستكێش‌ و ماسك بەكاربهێنێت‌ و پابەندی ڕێنماییە تەندروستی‌ و كارگێڕی‌ و ئارامییەكان بێت.

٨-ئاڵوگۆڕی بازرگانی‌ و كاركردن لە كەرتەكانی كارەبا، پاڵاوگەكان، ئاو، پەیوەندییەكان، ئینتەرنێت، كۆكردنەوەی خۆڵ و خاشاك، بەپێی بڕیار و ڕێكارە دیاریكراوەكانی وەزارەتی ناوخۆ و پارێزگای سلێمانی بەردەوامدەبێت، بە مەرجێك پابەندی ڕێنماییە تەندروستی‌ و كارگێڕی‌ و ئارامییەكان بن.

٩-دروستكردن‌ و گواستنەوەی خواردەمەنی بۆ كەرەنتینەكان بەپێی ڕێنماییەكان بەردەوامدەبن.

١٠-لەدوای (٤٨) سەعاتی قەدەغەی تەواو، هەموو كارێكی خێرخوازیی پێویستە بە ئاگاداری یەكە كارگێڕییەكان‌ و لیژنەی سەرژمێریكردنی خێزانە كەمدەرامەتەكانەوە بێت لە پارێزگاو یەكە كارگێڕییەكاندا.

١١-لەدوای (٤٨) سەعاتی قەدەغەی تەواو، بانكە ئەهلییەكان بەهەمان پەیڕەوی ڕاگەیەندراوی پێشوو بەردەوامدەبن.

١٢-بازاڕی دراوی سلێمانی‌ و هەر شوێنێكی تریش دادەخرێن تا ئەوكاتەی لەلایەن قائمقامیەتی قەزای مەڵبەندی سلێمانی‌ و بەڕێوەبەرایەتی ئاسایش‌ و ژوری بازرگانی و پیشەسازییەوە بەشێوەیەكی تەندروستیی گونجاو ڕێكدەخرێنەوە.

١٣-پێویستە هەموو هاوڵاتیان‌ و دامودەزگاكانی كەرتی گشتیی‌ و تایبەت‌ و مێدیاكان‌ و ڕێكخراوەكان بایەخی تەواو بە كەلتوری (خۆپارێزیی و تاكپارێزیی) بدەن‌ و برەو بە پەروەردەی تاكپارێزیی بدەن بۆ سەرلەنوێ‌ كردنەوەی بوارە جیاجیاكان لە ئایندەدا بەجۆرێك، كە تاك خۆی، خۆی بپارێزێت.

١٤-لەدوای (٤٨) سەعاتی قەدەغەی تەواو، هەر خزمەتگوزاریی‌ و ماركێت‌ و بوارێك بكرێتەوە پێویستە بە پلەی یەكەم كار لەسەر پەیڕەوی دلیڤەری بكات‌ و پابەندی ڕێنماییە تەندروستی‌ و كارگێڕی‌ و ئارامییەكان بێت.

ئەمەش لە کاتێکدایە، دوێنێ هەینی، وەزارەتی ناوخۆی هەرێم رایگەیاند، لە کاتژمێر ١٢ی نیوەڕۆی ئەمڕۆ شەممە ٤ی نیسانەوە، بۆ ماوەی ٤٨ کاتژمێر هاتوچۆ بە هەموو جۆرێک لە هەرێم قەدەغەدەکرێت و سەرجەم مارکێت و نانەواخانە و ئەو شوێنانەی بۆ خزمەتی هاوڵاتیان رێگەپێدراون دادەخرێن.