سەردێڕ:

ئاسایشی سۆران لەبارەی دەستگیرکردنی سێ کادری یەکێتی روونکردنەوە دەدات

فۆتۆ: 
2020-03-26

23666 جار خوێندراوەتەوە

ئاسایشی سۆران رایگەیاند، ئەو سێ کەسە بەهۆی شکاندنی قەدەغەی هاتوچۆ و گواستنەوەی خەڵک بە قاچاغ دەستگیرکراون، هیچ هۆکارێکی دیکە بۆ دەستگیرکردنیان نەبووە و لە ئێستادا ئازادکراون.

ئەمڕۆ پێنجشەممە، بەرێوەبەرایەتی ئاسایشی سۆران رایگەیاند، "دوێنێ شەو سێ هاوڵاتی دۆڵی باڵەیانی سەر بە ناحیەی قەسرێ، بەهۆی شکاندنی قەدەغەی هاتوچۆ و گواستنەوەی خەڵک بە قاچاخ لە لایەن ئاساێشەوە دەستگیرکران".

راشیگەیاندووە، "جیا لەم سەرپێچییە هیچ هۆکارێکی دیکە بۆ دەستگیرکردنی ئەم هاوڵاتیانە نەبووە و خودی دانیشتوانی ئەو ناوچەیەش ئاگادرن، بەڵام بەداخەوە کەسانێک ئەم بابەتانە دەخەنە قاڵبێکی سیاسییەوە و ڕێگری لە جێبەجێکردنی یاسا دەکەن".

لە راگەیاندراوەکەدا ئەوەش هاتووە، "بەهۆی ئەو کەشەی خوڵقێندرا، ئێوارەی ئەمڕۆ، دوای ئەوەی جێگری سەرۆکی حکومەت داوای ئازادکردنیانی کردبوو، لەسەر فەرمانی سەرۆکی حكومەت ئەو سێ کەسە ئازادکران".

ئاماژە بەوەشکراوە، "هێزەکانی ئاسایش یاسا و ڕێنماییەکان جێبەجێدەکەن و هیچ جیاکارییەک لەم بوارەدا ناکەن، هیوادارین لەم دۆخە سەختەدا هەموو لایەنە سیاسییەکان هاوکاربن تاکو یاسا و رێنماییەکان وەک خۆی جێبەجێبکرێت".

ئەوەش لە کاتێکدایە، هەر ئەمڕۆ وریا وەسانی بەرپرسی رێكخستنی كۆمیتەیی یەكێتی لە قەسرێ بە ئین ئاڕ تی راگەیاند، درەنگانی شەوی رابردوو شەماڵ مەلا لێپرسراوی بنكەی قەسرێی یەكێتی لاوانی كوردستان و كارۆخ بەكر پێشمەرگەی سەر بە یەكێتی لە سنوری كۆمیتەکەیان بەبێ بڕیاری دادگا و بە نایاسایی دەستگیركراون تا ئێستاش دیارنییە بۆ كوێ براون.

هـ.ئـ