سەردێڕ:

کەشناسی: بارانبارین بەردەوام دەبێت

فۆتۆ: 
2020-03-26

31869 جار خوێندراوەتەوە

کەشناسی رایگەیاند، هەرێمی کوردستان دەکەوێتە ژێر کاریگەرى درێژبوونەوەى نزمەپاڵەپەستۆکانى دەریاى ناوەڕاست و دەریاى سور و نیمچەدورگەى عەرەبى، بەو هۆیەوە باران لە ناوچە جیاجیاکانی هەرێم و سەنتەری پارێزگاکان دەبارێت و لە هەندێک کاتدا هەورەتریشقەش دەبێت.

ئەمڕۆ پێنجشەممە، کەشناسی هەرێم بڵاویکردووەتەوە، "ئەمڕۆ سەرەتاى هاتنى کاریگەرى ئەو شەپۆلە لەسەر ناوچە جیاجیاکانى هەرێم دەردەکەوێت، باران بە شێوەى پچڕپچڕ لە ناوچە شاخاوییەکان دەبارێت سەنتەرى پارێزگاکانیش ئەگەرى نمەبارانى هەیە".

راشیگەیاندووە، سبەینێ هەینى ٢٧ی ئازار، "لە شەودا کاریگەرى ئەم شەپۆلە کاردەکاتە سەر تەواوى ناوچەکە و بارانبارین لە تەواوى ناوچە شاخاویەکان و سەنتەرى پارێزگاکان دەبارێت".

باسی لەوەشكردووە، "ناوچە شاخاویەکانى پارێزگاى دهۆک، وەک دینارتە، ئاکرێ، سەرسەنگ، ئامێدى و کانى ماسى، لەگەڵ بەشێک لە ناوچە شاخاوییەکانى پارێزگاى هەولێر وەک، رەواندوز، سۆران، چۆمان، حاجى ئۆمەران، سیدەکان، بارزان و مێرگەسور بارانیان زیاتر دەبێت و رۆژى شەممە کاریگەرى ئەم شەپۆلە بەردەوام دەبێت".

ئاماژەی بەوەشکردووە، "جگە لە بارانبارین ئەگەرى هاتنى بارستە هەوایەکى تۆزوخۆڵ هەیە بۆ سەر ناوچەکەمان لە هەندێ ناوچە بە شێوەى تۆزوخۆڵ و لە هەندێ ناوچە لەگەڵ باران تێکەڵ دەبێت و کاریگەرى ئەم شەپۆلە لە رۆژى یەکشەممەوە لاواز دەبێت و ئاسمان لەو رۆژەدا بە نیمچەهەورى دەمێنێتەوە".

ئەوەشی خستووەتەڕوو، "رۆژى دووشەممە دووبارە لە زۆربەى ناوچەکان بارانبارین دەبێت، لە هەمان رۆژ کۆتاییدێت و کاریگەرى ئەم شەپۆلە تەواودەبێت"، دەشڵێت، "لە ماوەى ئەم شەپۆلەدا پلەکانى گەرما نزم دەبێتەوە و هەندێکجار هەورە تریشقەی لەگەڵدا دەبێت، ناوچە شاخاوییەکانى پارێزگاى دهۆکیش ئەگەرى هەبوونی تەرزەی هەیە".

ئەوەش لە کاتێکدایە، هەر ئەمڕۆ کەشناسی هەرێم پێشبینییەکانى کەش و هەواى بڵاوکردەوە و رایگەیاند، ئەمڕۆ و سبەى ئاسمان نیمچە هەور دەبێت لە هەندێ ناوچەش دەگۆڕیت بۆ هەورى تەواو لەگەڵ بارانبارین لە هەندێ کات و ناوچەدا، لە ئێوارەشدا ئەگەرى باران زیاتر دەبێت، لەگەڵ بوونى هەورە تریشقە.

‌بەپەلە