سەردێڕ:

سەنتەرى میترۆ بۆ حکومەت: کارى ڕۆژنامەنوسان بە کەم تەماشا مەکەن

فۆتۆ: 
2020-03-26

841 جار خوێندراوەتەوە

سەنتەرى میترۆ ڕایگەیاند، داواکارین لە حکومەت کارى ڕۆژنامەنوسان بە کەم تەماشا نەکەن و دەشڵێت، لە ماوەى ڕۆژانى قەدەغەکردنى هاتوچۆدا لە لایەن وەزارەتى ناوخۆى حکومەتى هەرێم نۆ پێشێلکارى بەرامبەر ڕۆژنامەنووسان و دەزگاکانى ڕاگەیاندن تۆمارکراون.

سەنتەرى میترۆ بۆ داکۆکیکردن لە ڕۆژنامەنووسان لە ڕاگەیەندراوێکدا بڵاویکردەوە، لە سێ هەفتەی رابردوودا نۆ پێشێلکارى بەرامبەر ڕۆژنامەنووسان و دەزگاکانى ڕاگەیاندن تۆماکراون کە بەشێوەیەک، لە ناویاندا ڕۆژى ١٤ ى ئازار رێگری لە هەكار ئامێدی بێژەری كەناڵی ئێن ئاڕ تى کراوە لە چوارتاوە بەرەو ئۆفیسی كەناڵەکەى لە رۆژی ١ی ئازار لە كۆمەڵگەی گومرگی حاجی ئۆمەران، لە ناحیەی حاجی ئۆمەران رێگری كرا لە پەیامنێری رۆژنیوز زۆزگ حەمەد مینە و رۆژی ٢٢ی ئازار، لە كاتی ڕوماڵی ڕاستەوخۆدا لە شاری سلێمانی كامێرامانی سایتی ناسنیوز ئاودێر عومەر لەلایەن هێزێكی ئاسایشەوە ڕێگری لێكراو و ئازار دراوە.

ئاماژەبەوەشکراوە، ڕۆژى ٢٥ی ئازار لە ناحیەی چوارقورنەی سەر بە ئیدارەی راپەڕین بازگەیەكی هێزەكان ٧٠ى هێزی پێشمەرگە، رێگرییان لە دوو تیمی كەناڵی سپێدە و پەیام كرد کە پێکهاتبون لە بڕوا عەلی، بەرزان ئەحمەد، رێناس ئەرسەلان کە دەچوون بۆ وەرگرتنی ئاماری توشبوان، بەڵام وەك خۆیان باسیدەكەن "هێرشیان بۆ هێناون و سوكایەتیان بە تیمەكان كرد".

ئەوەشخراوەتەڕوو، نیوەڕۆی ٢٤ی ئازار لە كاتی روماڵكردنی جموجۆڵی لەناكاوی بازاڕی دۆلارفرۆشانی شاری سلێمانی، هێزێكی ئاسایشی ناوخۆ بە دەمانچەی كارەبایی هێرشیانە كردە سەر تیمێكی كەناڵی ناوخۆییBMC ، كە پێكهاتبوون لە وێنەگر و پەیامنێری كەناڵەكە زانا جەلال، پێشەوا بەختیار.

باسلەوەشکراوە، رۆژی ٢٢ی ئازار بنكەی پۆلیسی داسنیا لە پارێزگای دهۆك تیمی كەناڵی سپێدەیان دەسبەسەر كرد کە پێکهاتبوون لە ئازاد سعید، پەیامنێر و محەمەد حسێن، كامێرامان، رۆژی ٢٠ی ئازار لەسەر سكاڵای ئەندامێكی پەرلەمانی كوردستان، ئومێد حاجی بەڕۆشكی لە سایتی پرس میدیا لەلایەن بنكەی پۆلیسی نەورۆز دەستبەسەركرا.

هەروەها، نیوەڕۆی ٢٠ی ئازار سەفین حەمید و شڤان هەركی لە ئاژانسی AFP و میدل ئیست ئیمێجس، ویستویانە بچنە ئاكرێ پابەندبوونی هاوڵاتیان بە رێنمایی تەندروستی و بڕیاری قەغەكردنی هاتووچۆن روماڵبكەن، لە بازگەی پردی بێخمە رێگرییان لێكرا و لە ٢٢ی شوبات لە لایەن پۆلیسی شەقلاوە، هونەر مزوری، كارمەندی جەزیرە دەست بەسەركرا و بە كەفالەتی ١٠ ملیۆن دینار ئازادكرا.

ئەوەش لەکاتێکدایە، بە پێى ڕاگەیەندراوى ژمارە ١١ كە لە ١٣ی ئازار دەچووە، واژۆی رێبەر ئەحمەد، وەزیری ناوخۆی لەسەرە و ئاڕاستەی هەردو پارێزگای هەولێر و سلێمانی كراوە و تێیدا هاتوە "بڕیاری قەدەغەکردنى هاتوچۆ لە نێوان شارەكاندا، رۆژنامەنووس و كارمەندانی دەزگاكانی راگەیاندن ناگرێتەوە، بە مەرجێك لە كاتی هاتن و چوندا باجی ئەو دەزگایەیان پێبێت كە كاری تێدادەكەن".