سەردێڕ:

یەکشەممەی داهاتوو موچەی ئەم شوێنە دابەشدەکرێت

فۆتۆ: 
2020-03-26

212254 جار خوێندراوەتەوە

دیجیتاڵ میدیای ئێن ئاڕ تی، ھەولێر، ئەحمەد مستەفا

وەزارەتی دارایی رایگەیاند، رۆژانی ٢٩ و ٣٠ و ٣١ی ئەم مانگە لەگەڵ ١ و ٢ی مانگی داهاتوو، موچەی مانگی ١٢ی ساڵی رابردووی وه‌زاره‌تی كاروباری شه‌هیدان و ئه‌نفالكراوان دابەشده‌كرێت.

لە نوسراوێکی وەزارەتی دارایی هەرێمدا هاتووە، کە لە رێککەوتی ٢٩ و ٣٠ی ئەم مانگەدا کە دەکاتە یەکشەممە و دووشەممەی داهاتوو، موچەی خێزانی شەهیدانی سەنگەر دابەشدەکرێت و لە رۆژی سێشەممەی داهاتووشدا، ٣١ی ئەم مانگە، موچەی کەسوکاری ئەنفالکراوان دابەشدەکرێت.

ئاماژە بەوەشکردووە، لە رێککەوتی ١ و ٢ی مانگی داهاتوودا کە دەکاتە رۆژی چوارشەممە و پێنجشەممەی داهاتوو، موچەی خێزانی شەهیدانی هاوڵاتی دابەشدەکرێت.

لە نوسراوەکەدا روونیشکراوەتەوە، "لە پێناو پاراستنى گیانى خێزانی شەهیدان و ئەنفالکراوان لە پەتاى ڤایرۆسى کۆرۆنا و بۆ جێبەجێکردنى رێنماییەکانی خۆپاراستن و سەلامەتى، لە کاتى دابەشکردنى موچەدا، هەماهەنگى تەواو لە نێوان وەزارەتەکانى دارای و ئابورى و شەهیدان و ئەنفالکراوان و تەندروستى و ناوخۆدا دەکرێت، تاوەکو قەرەباڵغى دروست نەبێت و لێکنزیکبوونەوە زۆر کەمبکرێتەوە."

لەلایەکی دیکەوە، هەر ئەمڕۆ، جوتیار عادل، وتەبێژى حکومەتى هەرێم رایگەیاند، بۆ دابەشکردنى موچە چاوەڕێی پارەکەى بەغدان و هەرکاتێک گەیشت، ئەوا بە میکانیزمێک کە ڕەچاوی ڕێنماییە تەندروستییەکان بکات، دەست بەدابەشکردنى موچەى سەرجەم وەزارەتەکان دەکەن.

ئەو موچەیەى دابەشدەکرێت موچەى مانگى ١٢ى ساڵى رابردووە و ١٣یەمین موچەیە بەبێ پاشەکەوت دابەشبکرێت.

ئەوەش لەکاتێکدایە، بڕیاربوو دوای دابەشکردنی موچەی وەزارەتی تەندروستیی، موچەی مانگی ١٢ی ساڵی رابردووی وەزارەتی پەروەردە دابەشبکرێت، بەڵام تاوەکو ئێستا دابەشنەکراوە.

لە رۆژی ٨ی ئازاری ساڵی رابردوودا پاشەکەوتی موچە هەڵگیرا و لەو کاتەوە تاوەکو ئێستا ١٢ موچەی بێ پاشەکەوتی سەرجەم وەزارەتەکان دابەشکراوە و لەگەڵ هاتنی کۆرۆنادا یەکەم وەزارەت موچەی وەزارەتی تەندروستیی دابەشکرا کە ئەوە ١٣هەمین موچەی ئەو وەزارەتەبوو بەبێ پاشەکەوت دابەشبکرێت و دابەشکردنی موچەی وەزارەتەکانی دیکە راگیراوە.