سەردێڕ:

پارێزگاری سلێمانی: نابێت هاوڵاتیان خۆراک بەهەدەر بدەن

فۆتۆ: 
2020-03-26

53681 جار خوێندراوەتەوە

پارێزگارى سلێمانى داوای لە هاوڵاتیان کرد، كۆتایی بە بەهەدەردانی خۆراك و پێداویستیەكانی ڕۆژانە بهێنن و ئەوەندە بەكاربهێنن كە پێویستیانە.

هەڤأڵ ئەبوبەکر لە راگەیەندراوێکدا ئاماژەى بەوەکردووە، دۆخە سەختەكان پێدەنێنە قۆناغەكانی كۆتایی و بە تێپەڕاندنی ئەم دۆخە، جیهان دوچاری دۆخێكی سەختی ئابووریی ‌و بازرگانیی دەبێت، لە ئایندەیەكی نزیكدا دۆخێكی نوێتر دەهێنێتە كایەوە، كە پێویست دەكات سەبەتەی خۆراكیی‌ و چارەسەرسازیی‌ و ئاسایشی ئابوریش، بەهەمان شێوەی ئاسایشی تەندروستیی ڕێكبخەن‌.

 داواشی لە هاوڵاتیان کردووە، "زیاد لە پێویستی خۆتان‌ و خۆراك ‌و پێداویستیەكان مەكڕن، چونكە هەموو ئەمانە ئەگەری خراپبوون‌ و كۆنبوون‌ و بەسەرچوونیان هەیە و سەرەتایەكی ترسناك دەبن بۆ برەودان بە گیانی خۆپەرستیی‌ و خوڵقاندنی قەیرانی ئابوریی."

پارێزگارى سلێمانى راشیگەیاندووە، "داوا لە ماركێت‌ و دوكانەكان دەكەین، زیاد لە پێویستی خۆیان‌ و خواستی كڕیارەكانیان خۆراك ‌و كەلوپەلی پێویست تاقت نەكەن، چونكە لە ئەگەری هەر خراپبوون ‌و تێكچوونێكدا خۆیان بەرپرسیار دەبن‌ و زیان بە ئاسایشی خۆراك ‌و ئابووریی نیشتمانی دەگەیەنن."

باسی لەوەشکردووە، هەموولا دڵنیا دەكەینەوە، كە جوڵە و ئاڵوگۆڕی بازرگانیی بەردەوامە، خۆراك‌ و سوتەمەنیی‌ و كاڵاو پێداویستیەكان بە قەبارەی زۆر و شیاو لەبەردەستدان، هەموویان لەژێر كۆنترۆڵی وردی چاودێری نرخ ‌و جۆرنو قەبارە و دابەشكردنی شیاوانەدان.

بڵاوبوونەوەى ڤایرۆسی کۆرۆنا قەیرانێکى ئابورى لە جیهاندا دروستکردووە وەک دابەزینى نەوت بۆ خوار ٣٠ دۆلار کە سەرچاوەى داهاتى ئەو وڵاتانەیە کە خاوەنى نەوتن، سەرەڕاى ئەوەش چەندین کۆمپانیاى گەورەى وڵاتان بەهۆى ئەم دۆخەوە زیانیان بەرکەوتووە و چەندین کەسیش بێکاربوون.