سەردێڕ:

​دوا ئاماری گیانلەدەستدانی توشبووانی کۆرۆنا لە ڕۆژهەڵاتی کوردستان ئاشکراکرا

فۆتۆ: 
2020-03-25

6653 جار خوێندراوەتەوە

ڕێکخراوی هەنگاو ڕایگەیاند، ٢١ کەسی دیکە بە هۆی توشبوون بە ڤایرۆسى کۆرۆنا لە ڕۆژهەڵاتى کوردستان گیانیان لەدەستداوە، کۆى گشتى ئەو کەسانەشى بە هۆى ڤایرۆسەکەوە تا ئێستا گیانیان لە دەستداوە گەیشتە ٢٢٧ کەس.

رێکخراوى هەنگاو بۆ مافەکانى مرۆڤ لە ڕاگەیەندراوێکدا بڵاویکردەوە، لە ڕۆژهەڵاتى کوردستان لە ماوەی ٢٤ کاتژمێری ڕابردوودا ٢١ هاوڵاتیی توشبووی ڤایرۆسى کۆرۆنا گیانیان لەدەستداوە و تائێستاش لانیکەم ٢٢٧ هاوڵاتیی کورد بە هۆی توشبوون بەو ڤایرۆسە گیانیان لەدەستداوە کە ٧٣ کەسیان ژن و ١٥٤ کەسیان پیاو بوون و پارێزگاى سنەش زۆرترین حاڵەتى تێدا تۆمارکراوە بە ٨٣ حاڵەتى گیان لەدەستدان کە ٢٥ ژن و ٣٨ پیاون.

ئاماژەبەوەشکراوە، حاڵەتەکانى گیانلەدەستدان بەمشێوەیە بووە لە پارێزگاکان ئیلام ٣٢ حاڵەت کە ١١ ژن و ٢١ پیاون و پارێزگاى کرماشان ٥٤ حاڵەت کە ١٨ ژن و ٣٦ پیاوبوون و لە ئورمییەش ٥٨ حاڵەت کە ٢٠ ژن و ٣٨ پیاوبوون.

ئەوەشخراوەتەڕوو، ئەو پارێزگایانەى لە ماوەى ٢٤ کاتژمێرى ڕابردوودا حاڵەتەکانى توشبوونیان تێدا تۆمارکراوە بەمشێویەیە، هەریەک لە بانە و بۆکان و ئورمییە و خۆى و میانداو و ئیلام و کرماشان دوو حاڵەتیان تێدا تۆمارکراوە و هەریەک لە ناوچەکانى سنە و کامیاران و قوروە و کەنگاوەر و سونقڕ و مێهران و ئەیوانى ڕۆژئاوا یەک حاڵەتیان تێدا تۆمارکراوە.  

هاوکات، بە پێى ڕاگەیەندراوەکەى هەنگاو ئێران تەنها ١٠٥ حاڵەتی بڵاو کردووەتەوە کە بەمشێوەیەیە، لە پارێزگای سنە ٣٣ کەس، ئورمیە ٤٠ کەس، کرماشان ١٩ کەس و ئیلام ١٣ کەس بە هۆی تووشبوون بە ڤایرۆسى کۆرۆنا گیانیان لەدەستداوە.

ئەمەش لە كاتێكدایە، دوێنێ چوارشەممە ٢٤ ى ئازارى ٢٠٢٠، وەزارەتی تەندروستیی ئێران رایگەیاند، لەماوەی ٢٤ کاتژمێری رابردوودا، هەزار و ٧٦٢ کەسی دیکە توشی کۆرۆنا بوون و ١٢٢ کەسیش بەهەمان هۆکار گیانیان لەدەستداوە.