سەردێڕ:

ترەمپ: تورکیا و هەسەدە رێککەوتنى ئاشتى جێبەجێدەکەن

فۆتۆ: 
2020-03-25

8521 جار خوێندراوەتەوە

دۆناڵد ترەمپ، سەرۆکى ئەمریکا رایگەیاند، سەرۆکى تورکیا و هێزەکانى سوریاى دیموکرات ئامادەییان دەربڕیوە بۆ جێبەجێکردنى رێکەوتنى ئاشتى لە رۆژئاواى کوردستان.

ترەمپ، لە چاوپێکەوتنێکى کەناڵى فۆکس نیوزدا ئەمڕۆ سێشەممە، رایگەیاندووە، "پێشتر بە تورکیام وتبوو لەگەڵ هێزە کوردییەکان(هەسەدە) رێکەوتن واژۆبکەن و بگەن بە ئاشتى، ئەردۆغان نەیکرد، هەسەدەش ئەو کات ئامادەنەبوون رێکەوتنى ئاشتى جێبەجێبکەن."

ترەمپ لەدرێژەى چاوپێکەوتنەکەیدا ئاماژەى بەوەشکردووە، "هەردوولا شەڕیان دژى یەکتر دەستپێکرد و دۆخەکە بەرەو خراپى رۆیشت، دواى دەستێوەردانى دەرەکى، ئێستا هەردوو لایەنى تورکیا و هەسەدە ئامادەن بۆ جێبەجێکردنى رێکەوتنى ئاشتى و هەردوولایان پێیان راگەیاندم کە ئێستا ئامادەن."

لە ٩ى ئۆکتۆبەرى ٢٠١٩، تورکیا ئۆپراسیۆنى بۆ سەر رۆژئاواى کوردستان دەستپێکرد و بە قوڵایى ٣٠ کیلۆمەتر چووە ناو خاکى رۆژئاواى کوردستان و لە ئێستادا دۆخى ناوچەکە شێوەیەک هێوربوونەوەى بەخۆوە بینیوە لەدواى دوو ڕێککەوتنى تورکیا لەگەڵ روسیا و ئەمریکا بۆ راگەیاندنى ئاگربەست.