سەردێڕ:

​ئێن ئاڕ تی زانیاریی لەسەر دورخستنەوەی بەرپرسی پاراستنی پارتی بڵاودەکاتەوە

کێشەو ململانێ و باڵباڵێنى ناو  پارتی
فۆتۆ: 
2020-02-17

48225 جار خوێندراوەتەوە

کێشە و ململانێ و باڵباڵێنى ناو هەردوو حزبە دەسەڵاتدارەکەى هەرێم، تا دێت روونتر دەبێت و ئاشکراتر باڵ و کوتلەکان دەناسرێنەوە و کارەکتەر و ناوە دیارەکانیان دەردەکەون.

لە نوێترین حاڵەتدا، کە بە ڕوونى کوتلەگەریى و باڵباڵێنى ناو پارتى دیموکراتى کوردستان نیشان دەدات، نیگەرانبونى (نەزهەت حالى) بەرپرسى دەزگاى پاراستنى پارتییە، کە دەنگۆى ئەوە هەیە لەسەر پۆستێکى بووبێت لە ساڵیادى کۆچى دوایى (ئیدریس بارزانى) کوڕە گەورەى مەلا مستەفا بارزانیدا نووسیویەتى.

سەرچاوەیەک لەناو پارتى دیموکراتى کوردستان بە ئێن ئاڕ تى راگەیاند، نەزهەت حالى چەند رۆژێکە زویرە و بەو هۆیەشەوە لەماڵى خۆى دانیشتووە، هەندێکی تریش دەڵێن لە کارەکەی دورخراوەتەوە.

نیگەرانیەکەشى کە لەدوایدا دەبێتەهۆى دورخستنەوەى لە پۆستەکەى، بە پۆستێکى دەردەبرێت لەئەکاونتى تایبەتى خۆى لەتۆڕى کۆمەڵایەتى فەیسبوک کە تیایدا ستایشى رۆڵى ئیدریس بارزانى دەکات و تیایدا دەڵێت:

 " نه‌ك ته‌نیا كوری شه‌هید و كوری پێشمه‌رگه‌ی له‌ سه‌نگه‌ر هه‌ستیان به‌ نه‌بوون و دوری باوك نه‌ده‌كرد، پێشمه‌رگه‌ و ده‌روێشانی ڕێبازی بارزانیش زۆر كه‌م هه‌ستیان به‌ نه‌مانی باوكی ڕوحیان مه‌لا مسته‌فای بارزانی ئه‌كرد، له‌به‌رئه‌وه‌ی هه‌مووان ده‌یانتوانی ده‌ردی دڵی خۆیان لای ئیدریس باس بكه‌ن. ئیدریس جگه‌ له‌ بیرو باوه‌ڕی خۆی، له‌و جیهانه‌ ئه‌سیری هیچ شتێك نه‌بوو كه‌ نه‌توانێت ڕۆژێك له‌ ڕۆژان ده‌ست به‌رداری نه‌بێت ،هه‌ر بۆیه‌ش بۆ ئه‌و پۆست و پایه‌ و ته‌نانه‌ت ژیانیش گرنگ نه‌بوو".

هەر لەو پۆستەیدا نەزهەت حالى نووسیویەتى:

" كه‌ ساڵان دێن و ده‌چن، زیاترهه‌ست به‌و زیانه‌ گه‌وره‌یه‌ی كه‌ به‌ كۆچی ناواده‌ی ئه‌و سیاسه‌تمه‌داره‌ مه‌زنه‌ له‌ بزاڤی رزگاریخوازی كورد كه‌وت ده‌كرێت. به‌ باوه‌ڕی خۆم گه‌ر ئه‌و سه‌ركرده‌ مه‌زن و دانا و به‌ ئه‌زمونه‌ له‌ ئێستادا له‌ ژیاندا بوایه‌ حوكمڕانییه‌كی باشتر و نێوماڵی كوردیشمان یه‌كگرتووتر و باشتر ده‌بوو" .

بەوتەى ئەو سەرچاوەیەى ناو پارتى دیموکراتى کوردستان کە نەیویست ناوى ئاشکرا بکرێت، ئەم چەند بڕگەیەى نووسینەکەى نەزهەت حالى بووەتە مایەى ناڕەزایى و تووڕەبوونى بارەگاى بارزانى، بە تایبەت لەو بڕگەیەدا کە باس لەوە دەکات ئەگەر ئیدریس بارزانى بمابایە، ئەوا حوکمڕانیەکى باشتر و نێو ماڵى کوردیش یەکگرتووتر و باشتر دەبوو، چونکە بە بڕواى کەسە نزیکەکان لە مەسعود بارزانیەوە، ئەو چەند رستەیە ماناى ئەوەیە کە ئێستا مەسعود بارزانی لەژیاندایە و کەسى یەکەمى نێو پارتیە، نە حوکمڕانیەکى باشمان هەیە و نە نێو ماڵى کوردیش یەکگرتووە.

سەرهەڵدانى ئەم باڵباڵێنەى نێو پارتى و ئاشکرا بوونى بۆ دەرەوەى خۆیان، لە کاتێکدایە کە ساڵانێکى دوورو درێژە بابەتى باڵباڵێن و کوتلەو دەستەگەرى لە نێو یەکێتیدا کە شەریکى یەکەمى پارتیە لە حکومەتدا، بە ئاشکرا سەریهەڵداوەو گەیشتۆتە نێو میدیاکان و لەوەش زیاتر ناوبەناو ئەو حزبە پارچەیەکى لێ جیائەبێتەوە و بەناوێکى ترەوە خۆى راگەیاندووە. ئەمەش ماناى ئەوەیە کە تەنانەت لەنێو ئەو دوو حزبەدا کە ٢٨ ساڵە حوکمڕانى کوردستان دەکەن، کەسانێک هەن کە سیاسەت و حوکمڕانیەکەیان پێ باش نییە، بەڵام زۆرجار بۆنەى لەو جۆرە دەقۆزنەوە بۆ هەندێک وردە قسەو وردە گلەیى.