سەردێڕ:

كەمپینی دژی داگیركاریی: بەهۆى بۆردومانەکانى تورکیاوە لە دوو ساڵدا ١٨ هاوڵاتی شەهیدبوون

فۆتۆ: 
2020-01-26

824 جار خوێندراوەتەوە

كەمپینی "دژی داگیركاریی و ژنكوشتن، بێدەنگیی بشكێنە" ئاشکرایکرد، بەهۆی بۆردومانەکانی تورکیاوە لە ماوەی دوو ساڵدا ١٨ هاوڵاتی شەهید بوون.

کەمپینەکە لە ساڵیادى خۆپیشاندانەکانى خەڵکى شێلادزێ دژى بنکە سەربازییەکانى تورکیا راگەیەنراوێکى بڵاوکردەوە و ئاماژەى بەوەکردووە، "بەهۆی ناڕەزاییەتییەکان دژی تورکیا ٢٩ کەس لە بادینان زیندانيکراون و بێسەروشوێنن و لە دەستی ئاسایشی پارتی دیموكراتی كوردستاندان."

باس لەوەش کراوە، "لە ئێستادا بە بێ هیچ هۆیەك ئاسایشی پارتی دیموكراتی كوردستان بەردەوام هاوڵاتی هەرێمی بادینان و هەولێر و سۆران بانگهێشتی ئاسایش دەكات و بە هەموو شێوەیەك سەركوتیان دەكات بۆئەوەی بەهیچ شێوەیەك لەدژی داگیركارییەكانی توركیا رانەپەڕن."

رؤژى (٢٦ی کانونی دووەمی ٢٠١٩)ژمارەیەک لە هاوڵاتییانى ناحیەی شێلادزێ هێرشیانکردە سەر بارەگایەکی سوپای تورکیا لە دەوروبەری ناحیە و ئاگریان لە کەلوپەل و ئوتۆمبێلە سەربازییەکانی تورکیا لە بنکەکە بەردا.