سەردێڕ:

تورکیا.. ٢٣٤ كۆچبه‌ر دەستگیرکران

فۆتۆ: 
2020-01-25

1686 جار خوێندراوەتەوە

له‌ پارێزگای ئیدرنەی تورکیا‌، ٢٣٤ كۆچبه‌ر ده‌ستگیركران كه‌ ئاماده‌كارییان كردبوو به‌ رێگه‌ی نایاسایی بچنه‌ ده‌ره‌وه‌ی توركیا.

میدیاکانی تورکیا ڕایانگەیاندووە، "هەڵمەتێکیان بۆسەر ئەو گرووپانەی به‌نیازبوون سنوور تێپه‌ڕێنن ئەنجامدا، کە هەریەک لە شارۆچکەکانی ئه‌نه‌ز، ئیپسالا، ئوزونكۆپرو و گونده‌كانی سنووری سه‌ر به‌ ناوه‌ندی پارێزگای ئیدرنەی گرتووەتەوە".

‌ڕاشیانگەیاندووە، "بەهۆی ئەو هەڵمەتەوە ٢٣٤ كۆچبه‌ر دەستگیرکراون، کە به‌ره‌گه‌ز عێراقی، میسری، سووری، جه‌زائیری، پاكستانی، ئیرانی، به‌نگلادیشی، ئه‌فغانی و مه‌غریبی بوون".

باسیان لەوەشکردووە، "لە دوای كاره‌كانی ئاسایش ئەو كۆچبه‌رانە ره‌وانه‌ی به‌ڕێوه‌به‌رایه‌تی فه‌رمانگه‌ی كۆچی پارێزگاكه‌ كراون".

ئەوەش لە کاتێکدایە، لە ١٦ و ١٧ی ئەم مانگەدا، میدیاکانی تورکیا دەستگیرکردنی ٤٥٣ کۆچبەرییان لەلایەن هێزە ئەمنییەکانەوە ڕاگەیاند، کە لە هەوڵی ئەوەدابوون بەشێوەی نایاسایی بەرەو وڵاتانی ئەوروپا بڕۆن.

ئەمەش لەکاتێکدایە، ١١ی ئەم مانگە، یەختێک لە ئاوەکانی نێوان یۆنان و ئیتاڵیادا بە ٥٣ سەرنشینەوە کە ٢٢یان کورد بوون ژێرئاوکەوت. پێنج کەسیان خنکان و تەرمەکانیان گەڕێندرایەوە بۆ هەرێم، سیانیان زیندوومانەوە و ١٤ی دیکەیشیان تا ئێستا چارەنوسیان نادیارە.

هـ.ئـ