سەردێڕ:

پاسپۆڕتی سلێمانی: نوسینگەی راستاندن دەکرێتەوە

فۆتۆ: 
2020-01-20

3975 جار خوێندراوەتەوە

بەرێوەبەرى پاسپۆرتى سلێمانى ڕایگەیاند، بڕیارە نوسینگەى فەرمانگەى راستاندن لە شارى سلێمانى بکرێتەوە، بۆیە ئەو هاوڵاتیانەی هەرێم کە مامەڵەکانیان پەیوەندى بە وەزارەتى دەرەوەى عێراقەوە هەیە، پێویست ناکات بڕۆنە بەغدا.

سالار عەبدوڵا، بەرێوەبەرى پاسپۆرتى سلێمانى بە ئێن ئاڕ تى راگەیاند، "بە مەبەستى کردنەوەى نوسینگەى راستاندن، تا ئێستا دوو جار شاندی وەزارەتى دەرەوەى عێراق هاتوونەتە سلێمانى و بۆ ئەو مەبەستە بریاردراوە بە کردنەوەى ئەو فەرمانگەیە لە سلێمانى و دواى گەرانەوەى وەزیرى دەرەوەى عێراق لە کۆنگرەى دافۆس، فەرمانگەکە دەکرێتەوە".

وتیشى، "زانیویانە کە رۆژانە نزیکەى ١٥٠ هاوڵاتی هەرێم دەچوونە ناوچەى سەوزى بەغدا بۆ ئەنجامدانى ئەو مامەڵانەى پەیوەندى بە وەزارەتى دەرەوەى عێراقەوە هەبووە".

باسی لەوەشکرد، "بۆ لەمەودوا هاوڵاتیان لە ماوەى نیو کاتژمێردا هەر لە شارى سلێمانى مامەڵەکانیان بۆ تەواو دەکرێت".

ئەوەش لە کاتێکدایە، پێشتر هاوڵاتیان بۆ ڕاییکردنی ئەو مامەڵانەی پەیوەندییان بە وەزارەتی دەرەوەی عێراقەوە هەیە، دەبوایە سەردانی ناوچەی سەوزی بەغدا بکەن و لەوێ مامەڵەکانیان تەواوبکەن، بەڵام بە کردنەوەی ئەو فەرمانگەیە لە شاری سلێمانی چیتر پێویست ناکات هاوڵاتیان بچنە بەغدا و هەر لەم شارە مامەڵەکانیان بۆ جێبەجێدەکرێت.