سەردێڕ:

فراکسیۆنی نەوەی نوێ: نابێت هیچ پلە باڵایەک موچەی خانەنشینی هەبێت

فۆتۆ: 
2019-12-12

2746 جار خوێندراوەتەوە

فراکسیۆنی نەوەى نوێ بە پێی راسپاردەی جوڵانەوەکەیان، داواى نەهێشتنى مووچەى خانەنشینى پلە باڵاکان دەکات.

 ئەمڕۆ پێنجشەممە، فراکسیۆنی نەوەی نوێ لە پەرلەمانی کوردستان، بەیاننامەیەکی دەربارەی موچەی خانەنشینی بڵاوکردەوە و لە بەیاننامەکەدا هاتووە، "لە سەروبەندى ئەو دۆخە ئابورییە سەختەدا کە هاوڵاتى هەرێمى کوردستان پیایدا تێدەپەڕێت و بەهۆى سیاسەتى شکستخواردووى بەناو ئابورى سەربەخۆوە کە بووە هۆى بڕینى قووتى خەڵکى کوردستان و موچەى فەرمانبەران و کارمەندانى حکومەت، ئەمەش دواجار کاریگەرى قورسى لەسەر بازاڕ و کاسبکارانیش جێهێشت".

لە بەیاننامەکەدا هاتووە، "وێڕاى هەموو ئەو نەهامەتییانەى کە کابینە یەک لەدواى یەکەکانى حکومەتى هەرێم لەڕووى ئابورییەوە بەسەر خەڵکى کوردستانیاندا هێنا، هێشتا لەژێر پاساوى جۆراوجۆردا نایانەوێت تەواوى موچەى خانەنشینى پلە باڵاکان (سەرۆکى هەرێم، سەرۆکى حکومەت، وەزیرەکان، سەرۆکایەتى پەرلەمان و پەرلەمانتاران، بریکارى وەزیر و راوێژکار و ئەندامانى ئەنجومەنى دادوەرى، بەڕێوەبەرە گشتییەکان و تەواوى پلە یەکەکان) ببڕن و نەیهێڵن".

هاوکات، فراکسیۆنی نەوەی نوێ داوادەکات، "موچەى خانەنشینى تەواوى پلە باڵاکان و هەموو خانەنشینە نایاساییەکان نەمێنێت و هەر کەسێک خولى خۆى لەو دامەزراوانەدا تەواو کرد بگەڕێتەوە سەر کارەکەى پێشترى".

ئاماژەی بەوەشکردووە، "پاش گەیشتنى بەتەمەنى خانەنشین بوون، بەیاسایەکى خانەنشینى گشتیى خانەنشین بکرێت و جیاوازیەکى ئەوتۆى نەبێت لەگەڵ خانەنشینانى تردا".

لە کۆتایی بەیاننامەکەدا هاتووە، "هەنگاوى یەکەم و گرنگ و راستەقینەى چاکسازى بەگێڕانەوەى ئەو پارە زۆرە دەبێت بۆ بودجەى گشتیى، هەروەها خەرجکردنى لەو کەرتە خزمەتگوزارییانەدا کە پەیوەستن بەژیانى رۆژانەى هاوڵاتییانەوە".

هـ. ئـ