سەردێڕ:

وەزارەتی کارەبا: سەرقاڵی زیادکردنی بەرهەمهێنانی کارەباین

فۆتۆ: 
2019-12-09

9163 جار خوێندراوەتەوە

وەزارەتی کارەبای هەرێم ڕایگەیاند، دەنگۆکانی مەترسی لەسەر پێدانی کارەبا بۆ هاونیشتمانیان ڕەتدەکەنەوە و هەوڵدەدەن بۆ باشکردنی رەوشی کارەبا.

 ئەمڕۆ دووشەممە، وەزارەتی کارەبای هەرێم ڕایگەیاند، "کاتەکانی بوونی کارەبا لە هەرێم بە تێکڕا لە نێوان ٩ بۆ ١٢ کاتژمێردایە"، ئاماژەی بەوەشداوە "لە ئێستادا ٣٥٨٠ مێگاوات کارەبا بەرهەمدەهێنرێت و بەرزترین خواستی بەکارهێنانی کارەباش ٦ هەزار مێگاواتە".

 باسییان لەوەشکردووە "ئەو دەنگۆیانە رەتدەکەینەوە کە باس لەمەترسی پێدانی کارەبا بۆ هاونیشتمانیان دەکات و وەزارەتەکەمان لە هەوڵدایە بۆ باشکردنی رەوشی کارەبا".

 وتووشیانە، "لە ٨ی ئەم مانگەوە توانیومانە بڕی ٢٥٠ مێگاوات کارەبا لەوێستگەی خۆرمەڵە و ١٥٠ مێگاوات کارەبا لە وێستگەی خەبات بخەینە ناو تۆڕی کارەبای نیشتمانییەوە".

 ئاماژەییان بەوەشداوە "سەبارەت بەهەر گومانێک لەسەر نادادپەروەریی لەدابەشکردنی کارەبا بەسەر شار و شارۆچکەکاندا، ڕەتی دەکەینەوە و هەروەک پێشتر روونکردنەوەمان داوە جەختدەکەینەوە تا ٣٠ی تشرینی دووەم، دابەشکردنی کارەبا لەسەر بنەمای یەکسانی کاتەکانی بوونی کارەبا بووە لە هەرێم".

 هاوکات باسییان لەوەکردووە "لەدوای ١ی کانوونی دووەمەوە، لەسەر داوای بەڕێوەبەرایەتی گشتی کارەبای سلێمانی وەزارەتی کارەبا بڕیاری دا کارەبا لەسەر بنەمای رێژە بێت".

 ئەوەش لە کاتێکدایە ساڵانە لەگەڵ هاتنی وەزری سەرما و گەرمادا لە شارەکانی هەرێم، بڕی پێدانی کارەبای نیشتیمانی بە ماڵان کەمدەکات، وەزارەتی کارەباش هۆکارەکەی بۆ زۆربوونی خواستی بەکارهێنانی کارەبا لەلایەن هاوڵاتییانەوە دەگەڕێنێتەوە.

هـ.ئـ