سەردێڕ:

ئەنجومەنى خانمان: لیژنەى فەتوا بەبێ رەچاوكردنی مافى ئافرەت فەتوای داوە

فۆتۆ: 
2019-12-06

9594 جار خوێندراوەتەوە

لەبارەى دەرکردنى چەند فەتوایەکى تایبەت بە سەرکەوتنى ئافرەت لەگەڵ شۆفێرانى تاکسیدا، ئەنجومەنى باڵاى خانمان پەیامێکى بڵاوکردەوە و رایگەیاند، "ئەم فەتوایە پێشێلکردنی کەرامەتی ژن و پیاوە، بە تایبەتی برایانی شۆفێری تاکسی ".

لە پەیامەکەى ئەنجومەنەکەدا هاتووە، "ئەنجومەنی باڵای فەتوا بەبێ رەچاوكردنی رۆڵ و پێگە و مافەكانی ئافرەتان، فەتواکانى بڵاوکردووەتەوە و پێشێلكردنیشە بۆ كاری دامودەزگه‌ فەرمی و یاساییەكان و لەگەڵ بنەماكانی یەكسانی جێندەری یەكناگرێتەوە، كە یەكێكە لە هێڵە گشتییەكانی كارنامەی كابینەی نۆی حكومەتی هەرێم".

ئەوەش خراوەتەڕوو، "پێویستە لیژنەی باڵای فەتوا هەستیارانەتر مامەڵە لەگەڵ ئەو بابەتە كۆمەڵایەتی و هەستیارانەدا بكات، رۆڵ و پێگەی خۆی بۆ هاوژیانی و ئاشتەوایی كۆمەڵایەتی و یەكسانی تەرخان بكات و لە وروژاندنی ئەم جۆرە بابەتانە خۆی بەدووربگرێت".

پەیامەکەى ئەنجومەنى باڵاى کاروبارى خانمان دواى ئەوە دێت کە لە ئەنجومەنى باڵاى فەتواى هەرێم چەند فەتوایەکى دەرکرد کە بەشێکیان پەیوەندییان بە حاڵەتى سەرکەوتنى ئافرەت هەبوو لەگەڵ شۆفێرانى تاکسیدا و لە چەند حاڵەتێکدا بە دروستى نەزانیوە.