سەردێڕ:

دانیشتوانی هەڵەبجە بەیاننامەیەکی ناڕەزاییان دایە سێ سەرۆکایەتییەکەی هەرێم

فۆتۆ: 
2019-11-19

1486 جار خوێندراوەتەوە

دانیشتوانی شاری هەڵەبجە کە لە ساڵی ٢٠١٥وە بڕیاری بە پارێزگابوونی دراوە، بەیاننامەیەکی ناڕەزاییان دایە سێ سەرۆکایەتییەکەی هەرێمی کوردستان.

لە بەیاننامەیەکدا بەناوی سەرجەم چین و توێژەکانی پارێزگای هەڵەبجە کە ئاراستەی سەرۆکایەتی پەرلەمان، حکومەت، هەرێمی کوردستان کراوە، باس لە خراپی دۆخی ئیداریی پارێزگاکە کراوە و لە چەند خاڵێکدا داواکارییەکانیان خستووەتەڕوو.

لە بەیاننامەکەدا، داوای ئەوەیان لە سێ سەرۆکایەتییەکەی هەرێم کردووە، کار بۆ بە فەرمی ناساندنی هەڵەبجە وەک نۆزدەیەمین پارێزگای عێراق و سەرپێخستنی دام و دەزگاکانی پارێزگای هەڵەبجە لەناویشیاندا دامەزراندنی ئەنجومەنی پارێزگا، بکەن.

هاوکات ئەوەش هاتووە، حکومەتی هەرێم داوا لە بەغدا بکات بۆ کردنەوەی دامەزراوە فیدراڵییەکان و هەڵەبجەش بکرێتە بازنەیەکی سەربەخۆی هەڵبژاردنەکانی عێراق. هەروەها، جەخت لە جێبەجێ کردنی یاسای پایتەختی ئاشتی کراوەتەوە.

ئاماژەیان بەوەشداوە، حکومەتی هەرێم دەبێت هەڵەبجە بکاتە پاکێجێکی تایبەت لە گفتوگۆکانیدا لەگەڵ حکومەتی ناوەندی و لە بودجەی گشتی و پەرەپێدانیشدا، تایبەتمەندی بە هەڵەبجە بدرێت تا ژێرخانی ئابووری پارێزگاکە بونیاد بنرێت.

لەکۆتایی بەیاننامەکەشیاندا وتویانە، دەبێت بەرپرسانی پارێزگای هەڵەبجە لە ئاست کەمتەرخەمییەکانی دەسەڵات لە بەرامبەر ئەو پرسەدا بەدەنگ بێن.

ئەمەش لەکاتێکدایە، لە ساڵی ٢٠١٥وە، بڕیاری بە پارێزگابوونی هەڵەبجە دەرچووە، کەچی تا ئێستاش، بەهۆی ناکۆکی لایەنەکان و کەمتەرخەمی حکومەتی هەرێمەوە، تەنانەت ئەنجومەنی پارێزگای پارێزگای هەڵەبجە دانەمەزرێندراوە.