سەردێڕ:

بەرپرسێکى پارتی: ڕادەستکردنەوەی بارەگاکانمان لە کەرکوک دواکەوتووە

فۆتۆ: 
2019-11-17

1426 جار خوێندراوەتەوە

بەرپرسی لقی سێی پارتی لە کەرکوک ڕایگەیاند، بەهۆی ئاڵۆزبوونی دۆخی عێراقەوە، ڕادەستکردنەوەی بارەگاکانیان لە کەرکوک دواکەوتووە.

محەمەد خورشید بەرپرسی لقی سێی پارتی لە کەرکوک، بە ماڵپەری فەرمی حزبەکەی وتووە، دانوستانەکانیان لەبارەی ڕادەستکردنەوەی بارەگاکانیان لە کەرکوک بەردەوامە و پەیوەستە بەو لیژنەیەی ھەرێمی کوردستان کە دانوستان لەگەڵ حکومەتی فیدڕاڵی دەکات.

باسی لەوەشکردووە، بڕیاربووە لە مانگی ڕابردوودا ھەنگاو بۆ ڕادەستکردنەوەی بارەگاکان بنێن، بەڵام ئاڵۆزبوونی ڕەوشی عێراق کاریگەریی کردووەتە سەر بەڕێوەچوونی دانوستانەکانی نێوان ھەرێم و بەغدا.

بەرپرسی لقی سێی پارتی لە کەرکوک ئاماژەی بۆ ئەوەشکردووە، لە کەرکوک پارتی ٣٠ بارەگای هەیە، کە سێ بارەگایان سەرەکین، دەستیان بەسەرداگیراوە و پێشتر بڕیاری ڕادەستکردنەوەیان لە لایەن سەرۆکایەتیی ئەنجومەنی وەزیرانی عێراقەوە دەرچووە.