سەردێڕ:

ئەردۆغان: تورکیا هاوسەری بەغدادی دەستگیرکردووە

رەجەب تەییب ئەردۆغان، سەرۆک کۆماری تورکیا
فۆتۆ: میدیاکانی تورکیا
2019-11-06

7167 جار خوێندراوەتەوە

ئەردۆغان لە زانکۆی ئەنقەرە وتارێکیدا و ڕایگەیاند، ئەوان هاوسەرەکەی ئەبوبەکر بەغداد-یان دەستگیرکردووە.

ئەمرۆ، ٦ی تشرینی دووەمی ٢٠١٩، رەجەب تەییب ئەردۆغان – سەرۆک کۆماری تورکیا، لە وتارێکیدا لە زانکۆی ئەنقەرە، باسی لە دەستگیرکردنی هاوسەرەکەی ئەبوبەکر بەغدادی، لەلایەن تورکیاوە کرد.

هاوکات، سەرۆکی تورکیا پشتراستی هەواڵی دەستگیرکردنی خێزانەکەی بەغدادی کردەوە و وتی، "جگە لە خوشکەکەی و هاوسەری خوشکەکەی بەغدادی، بۆ یەکەمجار ڕایدەگەیەنم کە تورکیا هاوسەرەکەی بەغدادی-شی دەستگیرکردووە".

ئەردۆغان وتیشی، "سوپای نیشتمانی سوریا کە لەلایەن گەورەترین پارتی ئۆپۆزسیۆنی وڵاتەکەمەوە بە تیرۆریست ناوبراون، تیرۆریست نین، بەڵکو بە تەنیشت سوپای تورکیاوە، بەرگری لە خاکەکەی خۆیان دەکەن".

ئەمەش دوای ئەوە هات، دوێنێ تورکیا ڕایگەیاندبوو، خوشکێکی ئەبوبەکر بەغدادی و هاوسەر و بوکێکیان دەستگیرکردووە و گواستوونیەتیەوە بۆ تورکیا.

ڕۆژى ٢٦ی تشرینى یەکەم لە ئۆپراسیۆنێکى هێزە تایبەتەکانی ئەمریکادا لە ناوچەیەکی پارێزگای ئیدلیب ئەبوبەکر بەغدادی سەرۆکی ڕێکخراوی داعش کوژرا.