سەردێڕ:

سەرۆکی فراکسیۆنی گۆڕان: مەترسی لەسەر موچەی فەرمانبەران هەیە

فۆتۆ: 
2019-11-06

4790 جار خوێندراوەتەوە

سەرۆکی فراکسیۆنی گۆڕان دەڵێت، مەترسی لەسەر موچەی فەرمانبەران هەیە، مانگانەش ٣٠٠ ملیۆن دۆلاری داهاتی نەوت دراوەتە وەزارەتی دارایی و چه‌ندین ملیۆن دۆلاری داهاتەکەشی بۆ چه‌ند که‌سێک ده‌ڕوات.

لە ڕاگەیەندراوێکدا، عەلی حەمە ساڵح دەڵێت، نیوه‌ زیاتری موچه‌ی هه‌رێم له‌ به‌غداوه‌ دێت، هیچ به‌رچاو ڕوونیه‌ک نییه‌ عێراق چی لێدێت؟ ئایا ئه‌م حکومه‌ته‌ به‌رده‌وام ده‌بێت؟ ئه‌م پێدانی پشکه‌ به‌ هه‌رێم ساڵی ئاینده‌ به‌رده‌وام ده‌بێت یان نا؟.

دەشڵێت، "تائێستا هیچ ڕێکەوتنێک لەسەر پشكی هەرێم لە بودجەی ساڵی داهاتوودا نەکراوە و له‌ ئه‌گه‌ری مانه‌وه‌ی عادل عه‌بدولمه‌هدیشدا زۆر ئەستەمە وەک ئەمساڵ بەغدا پارە بۆ موچەی هەرێم بنێرێت، بۆیە له‌ پاڵ چاکسازیکردندا، پێویسته‌ نه‌وت ڕاده‌ستبکرێت و موچه‌ی فه‌رمانبه‌ران گه‌ره‌نتی بکرێت .

سەبارەت بە فرۆشتنی نەوتی هەرێمیش ئاماژەی بۆ ئەوەکردووە، پاش به‌دواداچون و لێکۆڵینه‌وه‌ بۆ داهاتی نه‌وتی مانگی پێشوو به‌ پشتبه‌ستن به‌ داتای حکومه‌تی هه‌رێم و کۆمپانیای سۆمۆ، ڕۆژانه‌ هه‌رێمی کوردستان ٤٤١ هه‌زار به‌رمیل نه‌وتی هه‌نارده‌کردووه ‌و لە کۆی مانگه‌کەدا‌ نزیکه‌ی ١٣ ملیۆن به‌رمیل بووە.

سەرۆکی فراکسیۆنی گۆڕان جەختی لەوەشکردووەتەوە، کە گه‌نده‌ڵی ڕێکخراو هه‌یه ‌و مانگانه‌ چه‌ندین ملیۆن دۆلاری خه‌ڵک بۆ چه‌ند که‌سێک ده‌ڕوات.