سەردێڕ:

پنتاگۆن: هەسەدە ئەو سەنگەرانەی چۆڵکردووە کە دەکەونە سنورى ناوچەى ئارامەوە

فۆتۆ: 
2019-08-24

4088 جار خوێندراوەتەوە

وەزارەتى بەرگرىی ئەمریکا ڕایگەیاند، هێزەکانى سوریاى دیموکرات (هەسەدە) ئەو سەنگەرانەیان چۆڵکردووە کە دەکەونە سنورى ناوچەى ئارامەوە.

فه‌رمانده‌یی هێزه ‌ناوه‌ندییه‌كانی ئه‌مریكا له‌راگه‌یه‌ندراوێكدا ئاماژەى بۆ ئەوە کردووە، دواى پەیوەندییە تەلەفۆنییەکەى وەزیرانى بەرگرى ئەمریکا و تورکیا، هەسەدە پابەند بووە بە جێبه‌جێكردنی میكانیزمی ئاسایشى سنورى ناوچەى ئارام و بارەگاکانى لە سنورى ئەو ناوچەیەدا چۆڵکردووە.

له‌راگه‌یه‌ندراوه‌كه‌ى وەزارەتى بەرگرى ئەمریکادا هیچ زانیارییه‌ك ئاشكرا نه‌كراوه‌ سه‌باره‌ت به‌و ناوچه‌یه‌ی کە سه‌نگه‌ره‌كانی تێدا چۆڵکراوە و ئەوەی کە چه‌ند سه‌نگه‌ر چۆڵکراون.

بە گوێرەی ئەو وێنانەشی بڵاوکراونەتەوە، شەڕڤانانی هەسەدە بەشێک لەو تونێل و سەنگەرە داپۆشراوانەیان تێکداوە کە لە ناوچە سنورییەکانی نزیک لە تورکیا دروستیان کردبوون.

رۆژی هەینی، خولوسی ئاكار وه‌زیری به‌گریی توركیا و مارك ئه‌سپه‌ر وه‌زیری به‌رگریی ئه‌مریكا لە په‌یوه‌ندییه‌كی ته‌له‌فۆنییدا ڕایانگەیاند، پێویسته‌قۆناغی یه‌كه‌می پلانى دروستکردنى ناوچەى ئارام لەکاتى خۆیدا جێبەجێبکرێت.