سەردێڕ:

هەدەپە: دەسەڵات بەهۆی شکستی ٣١ ی ئازارەوە پەلاماری ئیرادەی گەل دەدات

فۆتۆ: 
2019-08-23

923 جار خوێندراوەتەوە

وتەبێژی پارتی دیموکراتی گەلان (هەدەپە) لابردنی سەرۆک شارەوانییەکانی ئامەد، وان و مێردین بە پەڵەیەک بە ناوچاوانی تورکیا ناودەبات و، داوادەکات دەسەڵات لەو بڕیارە پاشگەز ببێتەوە.

گونای کوبیلای سەبارەت بە لابردنی سەرۆک شارەوانییەکان رایگەیاند، ده‌سه‌ڵات كه‌ شكستی ٣١ی ئازاری پێ هه‌زم نه‌كراوه‌، په‌لاماری ئیراده‌ی گه‌لی داوه ‌و ده‌یه‌وێت به‌و جۆره ‌تۆڵه‌ بكاته‌وه‌.

وتەبێژی هەدەپە باسی لەوەش کرد، ده‌سه‌ڵات له ‌قه‌یرانی شه‌رعیه‌تدایه‌ و توانای به‌ره‌نگاربوونه‌وه‌ و روبه‌ڕووبونه‌وه‌ی نییه ‌لە زه‌مینه‌ی سیاسه‌تی دیموكراسیدا له‌گه‌ڵ هه‌ده‌په‌، بۆیە دەیەوێت هەدەپە له ‌چالاكی بخات.

گونای كوبیلای راشیگەیاند، "ئێمه ‌وه‌ك هه‌ده‌په‌، بانگه‌واز له ‌ده‌سه‌ڵات ده‌كه‌ین له‌م بڕیاره ‌پاشگه‌ز ببێته‌وه‌ و سه‌رۆك شاره‌وانییه‌كان بگه‌ڕێنێته‌وه‌ بۆ سه‌ر ئه‌ركه‌كانیان و ئه‌م پەڵەیەی داویانه ‌له ‌نێوچاوانی وڵاته‌كه‌مان بیسڕنه‌وه‌."

لە لایەکی ترەوە هەڵمەتی دەستگیرکردنی سەرکردە و ئەندامانی هەدەپە، کە لە رۆژی دووشەممەوە دەستیپێکردووە و زیاتر لە ٦٠٠ کەس دەستبەسەرکران، رۆژانی پێنجشەممە و هەینی لە ئیزمیر و ئیستانبوڵیش بەردەوامبوو، کە لەو هەڵمەتانەدا ٥٠ ئەندام و ٨ سەرکردەی هەدەپە دەستبەسەرکران.

هاوکات قەیوومی شارەوانیی وان، هەژماری کوردیی شارەوانییەکەی لە تۆڕی کۆمەڵایەتیی تویتەر سڕیوەتەوە.