سەردێڕ:

بەشێک لەهاوڵاتییانى کەرکوک بەهۆى نەبوونی شوێنی گەشتیاریی ڕوودەکەنە شارەکانى دیکە

فۆتۆ: 
2019-08-11

1384 جار خوێندراوەتەوە

وەک هەموو جەژنەکانی تر لە جەژنی قوربانیشدا لە کەرکوک، شەقام و ناو کۆڵانەکان چۆڵی زۆری پێوە دیارە، بەپێچەوانەوەوە رێگاکانی سلێمانی و هەولێر قەرەباڵغن و بەشێک لەهاوڵاتییان کەرکوک جێ دەهێڵن. 

هەروەک سەردەمی کۆن لەناو تەپوتۆز وکەشێکی نەگونجاودا منداڵان خەریکی یاری چەرخ و فەلەکن و بەشێکی زۆر لەهاوڵاتییانیش لەشوێنی سەربڕینخانەکانن و قوربانی دەکەن.

بەپێی ئامارەکانی کوشتارگەی کەرکوک ئەمساڵ زیاتر لە سێ هەزار سەر ئاژەڵ سەربڕدراون و ژمارەکە بە بەراورد لەگەڵ ساڵانی رابردوو زیاترە.

بەوتەی هاوڵاتییان نەبوونی شوێنی گەشتیاریی و کەمی پارک و باخچە و شوێنی حەوانەوە، هۆکاری سەرەکییە بۆ ئەوەی دانیشتووانی کەرکوک لە جەژندا زیاتر رووبکەنە شارەکانی تر و ناوشار چۆڵ بێت.

لەبەشێک لەگەڕەکە میللیەکانی کەرکوک هاوشێوەی جاران پیاوانی گەڕەک دوای کۆبوونەوەیان سەردانی  دراوسێکانیان دەکرد و چوکلێتی جەژنیان وەردەگرت و گەردن ئازادیان لەیەکتردەکرد.

لەم جەژنەشدا هاوڵاتییانی کەرکوک داوای یەکڕیزی و ڕێککەوتنی لایەنەکان دەکەن بۆ چارەسەرکردنی گرفتە ئەمنی و ئیداریەکانی شارەکە و هیواخوازن جەژنی قوربان ببێتە هۆی هاندانی قوربانی دانی لایەنەکان لەپێناو بەرژەوەندی هاوڵاتییان.