سەردێڕ:

بەرپرسێکی نەوەی نوێ: ٢٨٠ رۆژە کێشەی خەڵک لە دانانی پارێزگارێکدا کورتکراوەتەوە

فۆتۆ: 
2019-07-05

1001 جار خوێندراوەتەوە

بەرپرسی پەیوەندییەکانی دەرەوەی جوڵانەوەی نەوەی نوێ رایگەیاند، ٢٨٠ رۆژە کێشەی خەڵک لە دانانی پارێزگارێکدا کورتکراوەتەوە، جەختیش دەکاتەوە لەوەی، دەبوایە پەرلەمانی کوردستان ئەرکەکانی لە بەدواداچوون بۆ پرۆژە خزمەتگوزارییەکان جێبەجێکردبووایە.

ئاریان تاوگۆزی بەرپرسی پەیوەندییەکانی دەرەوەی نەوەی نوێ ئاماژەی بەوەکردووە، "پاش ٢٨٠ ڕۆژ لە هەڵبژاردنی پەرلەمانی كوردستان حكومەتێك هێشتا پێكنەهاتووە و هەموو كێشەی خەڵك لەوەدا چڕبووەتەوە كە كێ بكرێت بە پارێزگاری شارێك كە هیچ پەیوەندیی بە پەرلەمانی كوردستانەوە نییە و پەرلەمان بە زەڕەیەك دەسەڵاتی نە لە دانانی هەیە نە لە لابردنی."

باسی لەوەش کردووە، "خەڵكی كەركوك كە مافی بەشداریكردنی لە هەڵبژاردنی پەرلەمانی كوردستان نییە، ئێستا ئەو پەرلەمانە ئیفلیج كراوە لەبەرئەوەی كێ دەبێت ببێت بە پارێزگاری ئەو شارە و ئایا لە گروپی ٣١ی ئاب بێت یان لە گروپی ١٦ی ئۆكتۆبەر یان لە گروپی مەجلیسی ڕێفراندۆم."

ئەوەشی خستووەتەڕوو، "ئەوەی ئەبوایە ڕویبدایە پەرلەمان تا ئێستا لێپێچینەوەی لە چەندین وەزیر بكرایە سەبارەت بە: نەبوونی كارەبا، نەبوونی كار، نەبوونی موچە، نەبوونی هێزێكی پێشمەرگەی نیشتیمانی، نەبوونی دادگای سەربەخۆی دوور لە حیزب، نەبوونی سیستەمێكی پەروەردە، نەبوونی بازاڕ و كار و كاسپی، نەبوونی دەرمان و نەخۆشخانە و سیستەمێكی تەندروستی بۆ ئەم سەردەمە بگونجێت، نەبوونی ژیانێكی شایستە بۆ كەمئەندامانی جەستەیی و دەروونی، نەبوونی ڕێگاوبان، نەبوونی پشتگیری جوتیاران و گوندنشینان، نەبوونی سیاسەتێكی دەرەوەی عاقڵانە، نەبوونی شەفافییەت لە فرۆشتنی نەوت و سەرچاوە سروشتییەكانی سەر ئەرز و بن ئەرزی وڵات، نەبوونی هێزێكی ئاسایشی دوور لە دەستی منداڵانی بنەماڵە دەسەڵاتدارەكان، بە سەدانی نەبوونی تریش..!"

بەرپرسی پەیوەندییەکانی دەرەوەی نەوەی نوێ باسی لەوەش کردووە، "ئێستا خەڵكی كوردستان لە پاش ئەو هەموو نەبوونییە هەموو خەمیان ئەوەیە نەك كورد بەڵكو چی كوردێك پارێزگاری كەركوك بێت، سەرۆكی بانكی ناوەندی بەریتانی كەنەدییە و بەنیازە ئەمساڵ واز لە پۆستەكەی بهێنێت، هەرچەندە هەموو كابینەی حكومەتی بەریتانی تەكلیفیان لێ كرد زیاتر بمێنێتەوە تا پرۆسەی هاتنەدەرەوەی بەریتانیا لە یەكێتی ئەوروپا كۆتایی دێت، ئێوەش پارێزگاری شار بدەن بە هیندییەك، دڵنیابن شارەكەتان پێشكەوتن بەخۆوە دەبینێ."

هـ.ع