سەردێڕ:

باڵیۆزی تورکیا: بوونی هێزەکانمان لە باشیک لەسەر داوای لێپرسراوانی باڵای عێراق بووە

فاتیح یەڵدز باڵیۆزی تورکیا لە عێراق
فۆتۆ: ئەرشیف
2019-04-16

1373 جار خوێندراوەتەوە

فاتیح یەڵدز باڵیۆزی تورکیا لە عێراق ڕایگەیاند، بوونی هێزەکانی وڵاتەکەی لە ناوچەی باشیک، لەسەر داوای بەرپرسانی باڵای عێراق بووە و لێکتێگەیشتنی هاوبەش چوونە دەرەوەی ئەو هێزانە دیاری دەکات.

یەڵدز ئەمڕۆ سێشەممە (١٦ی نیسانی ٢٠١٩) لە کۆنفڕانسێکی ڕۆژنامەوانیدا لە شاری نەجەف ڕایگەیاند " بوونی هێزەکانی تورکیا لەسەر داوای بەرپرسانی باڵای عێراق بووە و یەکپارچەیی خاکی عێراق بابەتێکی زۆر گرنگە بەلامانەوە، چوارچێوەی لێکتێگەیشتنی هاوبەش چوونە دەرەوەی ئەو هێزانە دیاری دەکات و ئەو بابەتەش کاریگەریی نابێت لەسەر پەیوەندییە بازرگانییەکانی نێوان هەردوو وڵات و کێشە دروست ناکات".

باڵیۆزی تورکیا وتی "بۆ ئەوە هاتوون گفتوگۆ بکەن لەسەر چەند دۆسییەک، لەوانەش کردنەوەی کونسوڵگەری تورکیا لە پارێزگای نەجەف و وەرگرتنی ڕێوشوێنە پێویستییەکان، ئەوە سەرەڕای بوونی قسەکردن لەسەر دۆسیەکانی بواری ئابوری و بازرگانی لەگەڵ عێراق، کە پێشکەوتنی باشی تێدا بەدەستهاتووە".

ئەوەش لە کاتێکدایە نوسینگەی حەیدەر عەبادی سەرۆک وەزیرانی پێشووی عێراق لە ساڵی ٢٠١٥دا ڕایگەیاند، حکومەت ئاگادارە لە هاتنە ناوەوەی هێزێکی تورکی بە قەبارەی فەوجێکی زریپۆش و ژمارەیەک لە تانک و تۆپی قورس هاتوونەتە ناو خاکی عێراقەوە، بە دیاریکراویش بۆ پارێزگای نەینەوا، جەختیشیکردەوە ئەو هاتنەی سوپای تورکیا لەسەر داوا و مۆڵەتی دەسەڵاتدارانی حکومەتی عێراق نەبووە.

ع.م