سەردێڕ:

کەرکوک.. بینای باخچەیەکی ساوایان مەترسیی ڕووخانی ھەیە

فۆتۆ: 
2019-04-14

962 جار خوێندراوەتەوە

لە شاری کەرکوک باحچەیەکی ساوایان کە ١٥٠ منداڵی تێدایە بەھۆی کۆنی بیناکەیەوە مەترسی ڕووخانی لەسەرە.

 لە بینایەکی کۆن و ڕزیودا زیاتر لە ١٥٠ منداڵی ساوا یاریدەکەن، سەندرا و ھاوڕێکانی ڕۆژانە چەند کاتژمێرێک لە باخچەی ساوایانی گوڵاڵە لە کەرکوک دەمێننەوە، بەڵام سەقفی پۆلەکانی باخچەکە بەشێکی لێ بووەتەوە و لەکاتی بارانبارینیشدا دڵۆپە دەکات، بەشێک لەو گەچەی بە سەقفی پۆلەکانەوەیە بەردەبێتەوە.

باخچەکە لە ساڵی ١٩٧٩دا دروستکراوە و مامۆستایانی باخچەکەش ناتوانن بەبێ ترس وانە بە منداڵەکان بڵێنەوە و داوادەکەن بیناکەیان بۆ نۆژەنبکرێتەوە.

شێرزاد ڕەشید بەڕێوەبەری پەروەردەی خوێندنی کوردی لەکەرکوک دەڵێت، لەگەڵ بەشی بیناسازی پەروەردەی حکومەتی عێراق، پلانیان داڕشتوە بۆ نۆژەنکردنەوەی ئەو قوتابخانە و باخچانەی کە کۆنن و پێویستیان بە نۆژەنکردنەوەیە، کە زیاتر لە ١٥ قوتابخانە و باخچەی ساوایانن.

پێش ئەوەی بچنە قوتابخانە، منداڵان لە زۆربەی ناوچە جیاوازەکان دەخرێنە باخچەی ساوایان و ئامادە دەکرێن بۆ خوێندن و فێری مامەڵەکردن و ڕەفتاردەکرێن بۆئەوەی کاتێک دەچنە قوتابخانە، بتوانن بەشێوازێکی گونجاو مامەڵە بکەن.

د.ن