سەردێڕ:

​ئەمڕۆ لیژنەی دارایی پەرلەمانی عێراق پشکی هەرێم لە بودجەدا یەکلایدەکاتەوە

فۆتۆ: 
2019-01-21

8739 جار خوێندراوەتەوە

ئەمڕۆ لیژنەی دارایی پەرلەمانی عێراق کۆدەبێتەوە و پشکی هەرێمی کوردستان لە پرۆژە یاسای بودجەی گشتی ساڵی ٢٠١٩دا یەکلایدەکاتەوە.


ئەمڕۆ لیژنەی دارایی پەرلەمانی عێراق کۆدەبێتەوە و پشکی هەرێمی کوردستان لە پرۆژە یاسای بودجەی گشتی ساڵی ٢٠١٩دا یەکلایدەکاتەوە.

 ئەحمەد حاجی ڕەشید ئەندامی لیژنەی دارایی پەرلەمانی عێراق بە ئێن ئاڕ تی وت، پڕۆژە یاسای بودجەی گشتی عێراق لە ڕووی تێکستەوە تەواوبووە و تەنها خاڵە ناکۆکەکان ماون، وەک پشکی هەرێم و بودجەی حەشدی شەعبی و بودجەی ئەو پارێزگایانەی کە لەشەڕی داعشدا زیانیان بەرکەوتووە لەگەڵ ئەو پارێزگایانەی کە نەوتیان تێدا بەرهەمدەهێنرێت، بۆیە لەکۆبوونەوەی ئەمڕۆی لیژنەی داراییدا گفتوگۆیان لەبارەوە دەکەن.

ئەحمەد حاجی ڕەشید وتیشی، دوێنی لەگەڵ وەزیری دارایی کۆبوونەتەوە و پلانی ئەمڕۆیان تاوتوێکردووە کە پشکی هەرێم هێڵی سورە و دەبێت بدرێت، لەگەڵ ئەوەشدا نەرمیەکی هەستپێکراو هەیە سەبارەت بە موچەی فەرمانبەرانی هەرێم  و پێشمەرگە.

ئەو ئەندامی لیژنەی دارایی ئاماژەی بەوەشکرد، لە پڕۆژە یاسای بودجەدا دەقێکی  تایبەت بە گەنمی جوتیاران دانراوە بۆ ئەوەی وەزارەتی دارایی پارەی ساڵەکانی (۲٠۱٤_۲٠۱٥_۲٠۱٦) تەرخانبکات بۆ ئەوەی شایستەکانی جوتیارانی پێبدرێت.

ئەحمەد حاجی ڕەشید باسی لەوەشکرد، پڕۆژە یاسای بودجە دەبێت تا ڕۆژی ٢٥ی ئەم مانگە یەکلابکرێتەوە و لە پەرلەمانی عێراق پەسەندبکرێت کە ئەوە دوا وادەیە.

لە پڕۆژە یاسای بودجەی گشتی ساڵی ٢٠١٩ی عێراقدا  پشکی هەرێمی کوردستان بە لە سەدا ١٢ و پۆینت ٦٧ دیاریکراوە، کە ئەوەش نیگەرانی نوێنەرانی کورد لە بەغدا و حکومەتی هەرێمی بەدوای خۆیدا هێنا.

هـ،ڕ