کەشناسی عێراق: دەنگۆی هاتنی شەپۆلێکی گازی ژەهراوی راست نییە

2020-04-07

13770 جار خوێندراوەتەوە

+ -

دەستەی کەشناسی و بومەلەرزەزانی عێراق رایگەیاند، دەنگۆی هاتنی شەپۆلێک لە گازی ژەهراوی بۆ عێراق دوورە لە ڕاستییەوە.

عامر جابری بەڕێوەبەری دەستەی کەشناسی و بومەلەرزەزانی عێراق، ئەمڕۆ سێشەممە، لە کۆنفرانسێکی رۆژنامەوانیدا رایگەیاند، "لە تۆڕە کۆمەڵایەتیەکاندا دەنگۆی هاتنی گازێکی ژەهراوی بۆ عێراق بڵاوبووەتەوە، کە دوورە لەراستییەوە و ئامانج لەو دەنگۆیانە دروستکردنی ترس و دڵەڕاوکێیە لای هاوڵاتیانی عێراقی".

روونیشیکردەوە، "دەستەی کەشناسی لەڕێگەی بەشی پێشبینییەکانی کەشوهەواوە بەدواداچوونی بۆ ئەو بابەتە کردووە و دەرکەوتووە هیچ گازێکی ژەهراوی لەوجۆرە لە هەوادا بوونی نییە".

هاوکات، داوای لە هاوڵاتیانیشکرد لەبارەی بڵاوبوونەوەی هەواڵی نادروستەوە هۆشیاربن و بۆ وەرگرتنی زانیارییەکان بگەڕێنەوە بۆ پەیجە حکومییەکان یان میدیا.