فراکسیۆنا نەوەی نوێ سەدەمێن بایکۆتا رووینشتنا ئەڤرۆیا پەرلەمانی ئەشکەراکر

PM:06:11:27/10/2021

520 جار خوێندراوەتەوە

+ -

جێگرێ سەرۆکێ فراکسیۆنا نەوەی نوێ ل پەرلەمانێ کوردستانی ڕاگەهاند، "بسەدەمێ وێیەکێ کو لێپرسینێ بۆ سفکاتیکرن و گوتنێن نە جوانێن پەرلەمانتارەکی نەهاتە کرن، مە بایکۆتا رووینشتنا ئەڤرۆیا پەرلەمانی کر".

ئەڤرۆ چارشەمبی، کاوە عەبدولقادر جێگرێ سەرۆکێ فراکسیۆنا نەوەی نوێ ل پەرلەمانێ کوردستانێ ددەمێ ئەنجامدانا کونگرەیەکێ رۆژنامەڤانی ئاماژە ب وێیەکێ کر، "مە داخاز ژ دەستەیا سەرۆکاتیا پەرلەمانی کر کو لێپرسینێ دگەل وی پەرلەمانتاری بکەن کو گوتنێن نە جوان ل هەمبەر پەرلەمانتاران بکارئینابوون".

گوتژی، "ژبەرکو سەرۆکایەتیا پەرلەمانی نکاری ب کارێ خۆ و ئەرکێ پەیرەوێ پەرلەمانی یێ خۆ رابیت و ئیجرائاتا دگەل وی پەرلەمانتاری بکەت کو ئاخفتنێن نە جوان لهەمبەر چەند پەرلەمانتارەکان کربوون و حەسانە ژێ بهێتە وەرگرتن و ئەو پەرلەمانتارە داخازا لێبوورینێ بکەت لناڤ پەرلەمانی، مە وەک هەلویستەکی دگەل چەند فراکسیۆنێن دی بایکۆتا رووینشتنا پەرلەمانێ کوردستانێ کر".

کاوە عەبدولقادر زەلاکر، "دگەل هندێ کو ئەو کارێ وی پەرلەمانتارێ پارتی ل دژی فراکسیۆنا مە نەبوو لێ ئەم دژی هەر بنپێکاریەکێ نە کو بۆ سەر هەر پەرلەمانتارەکی و هەر فراکسیۆنەکێ بهێتە کرن و دژی هەر رەنگێ سفکایەتییەکێینە کو د پەرلەمانیدا بهێتە کرن".

گوتژی، "پەرلەمانێ کوردستانێ مولکی خەلکێ کوردستانێیە و مولکێ چ حزب و ئالیەکی نینە و لسەر چ ئالیان نەهاتیە تاپۆکرن".

ل پشکەکا دیا کۆنگرەیێ رۆژنامەڤانی، جێگرێ سەرۆکێ فراکسۆنا نەوەی نوێ ئاماژە ب وێیەکێ کر، "سەرۆکێ فراکسیۆنا نەوەی نوێ بسەدەمێ دەربڕینا هەلویستەکێ نەرازی ئەڤە حەفت مەهە ژ ئالیێ دەستەیا سەرۆکاتیا پەرلەمانی ب رەنگەکێ نەیاسایی ژ ئامادەبوونێن پەرلەمانی هاتیە بێبەهرکرن و ناهێلن بهێتە دناڤ ئاڤاهیێ پەرلەمانیدا".

گوتژی، "لێ پەرلەمانتارێن دی هێرشدکەنە سەر پەرلەمانتاران و ئاخفتنێن نەجوان و سفکاتی ب پەرلەمانتاران دکەن و چ ئیجرائاتاک دگەل ناهێتە کرن".

تەکەز ژی کریە، "ب نێرینا مە ئەڤە سەدەمێ لاوازیا دەستەیا سەرۆکاتیا پەرلەمانیە".

هەڤدەم فراکسیۆنا نەوەی نوێ و ئێکەتی و گۆڕان و کۆمەل و یەکگرتوو ئیسلامی و سەربخۆ و ئازادی ڕاگەهاندنەکا نەرازیبوونێ یا هەڤپشک بەلاڤکر و داخاز ژ سەرۆکاتیا پەرلەمانێ کوردستانێ کر کو بهایێ پەرلەمانی بپارێزن و داخازکر ئەو پەرلەمانتارێ پارتی کو ئاخفتنێن نە جوان گوتین ب ئەشکەرایی ل ناڤ رووینشتنا پەرلەمانی داخازا لێبورینێ ژ پەرلەمان و خەلکێ کوردستانێ بکەت و ئەو کارە دووبارە نەبن.