PM:10:15:19/07/2021
1588 جار خوێندراوەتەوە
+
-
پەیڤدارێ فەرماندەیا گشتی یا هێزێن چەکدارێن عێراقێ ئاشکراکر، سەرۆکوەزیرێن عێراقێ فەرمانا دەستەسەرکرنێ بۆ بەرپرسێ وێ هێزا ئەولەکاریێ دەرخست یا کو د ئەرکێ پاراستنا وی بازارێ مللی یێ دەڤەرا سەدری دا بوو، ئەوێ ئێڤاریا ئەڤرۆ تەقینەکێ تێدا روویدای.
لیوا یەحیا ڕەسول پەیڤدارێ گشتیێ هێزێن چەکدارێن عێراقێ ڕاگەهاندنەک دەربارەی تەقینا ئەڤرۆیا دناڤ بازارێ مللیێ سەدری دا روویدای بەلاڤکر و ڕاگەهاند، مستەفا کازمی فەرماندارێ گشتیێ هێزێن چەکدارێن عێراقێ فەرمانا دەستەسەرکرنێ بۆ فەرماندەیێ وێ هێزا ئەولەکاریێ دەرخست ئەوێ پاراستنا وی بازارێ مللی د ستویێ وی دابوو.
ئاماژە ب وێیەکێ ژی کر، ڤەکۆلینێ لسەر بوویەرێ دەستپێکریە و هێزێن ئەولەکاریێ ژی دوێ دەڤەرێ دا هاتنە بەلاڤکرن.
ئێڤاریا ئەڤرۆ دووشەمبێ تەقینەکێ بازارێ مللیێ وەحیلات ل دەڤەرا سەدر ل ڕۆژهەلاتا بەغدا کرە ئارمانج و تێدا بەشەک ژ وان وەلاتیێن بۆ مەرەما کرینا پێتڤیێن جەژنا قوربانێ چوبوونە وی بازاری بوونە قوربانی.
ل گۆرەی ئاماران، د ئەنجامێ وێ تەقینێ دا هەیا نها ٢٢ کەس هاتنە کوشتن و ٤٧ کەسێن دی ژی برینداربوونە.