کۆمسیۆنا بلندا سەربەخۆیا
هەلبژارتنێن عێراقێ ڕاگەهاند، رازیبوون ل سەر هژمارا داویێ یا دەنگدەران هاتیە
دان، هەڤدەم، ئەو کەسە دیارکرینە کو مافێ دەنگدانێ هەیە ب گشتی و ب تایبەتی و
ئەوێن بۆ ئێکەمجار دەنگی ددەن.
جومانە غولای پەیڤدارا کۆمسیۆنا
بلندا هەلبژارتنێن عێراقێ بۆ ئاژانسا نووچەیێ یا عێراقێ ڕاگەهاند، کۆمسیۆنێ
ئامادەکاریێن داویێ بۆ ٢٤ ملیۆن و ٢٩٩ هزار دەنگدەران پەسەندکریە، کو کارتا
بایۆمەتری یا دەمکی کورت هەیە.
ئەوژی دیارکر، ژ وان ٢٤ ملیۆن
دەنگدەران، نێزیکی ئێک ملیۆن کەسان ئێکەمجارە دەنگی بدەن، ژ دایکبوویێن سالا ٢٠٠١
و ٢٠٠٢ و ٢٠٠٣ـێنە.
جومانە غولای ئاماژە ب وێیەکێ
کریە، کۆمسیۆنێ خشتەیێ داویێ ١٢٠ هزار و ١٢٦ دەنگدەرێن ئاوارە ژی تەمامکریە و بسەر
٨٦ ناڤەندێن دەنگدانێ هایتینە پارڤەکرن.
پەیڤدارا کۆمسیۆنێ دەربارەی ڤەکێشانا
ئالی و بەربژێران ئاماژە ب وێیەکێ کر، بایکوت و ڤەکێشان ژ هەلبژارتنان باندوریێ
لسەر بڕێڤەچوونا هەلبژارتنان نابیت و تا نها ژی چ بەربژێرەکی داخازا ڤەکێشانێ
پێشکێشی کۆمسیۆنێ نەکریە.
بڕیارە ل ١٠ی تشرینا ئێکێ یا ئەڤسالە
هەلبژارتنێن بەروەخت ل عێراقێ بڕێڤەبچن، بڕیارە ژی پرۆسە ب چاڤدێریا کریاری یا
نەتەوەیێن هەڤگرتی و ئێکەتیا ئەوروپا و رێکخراوێن ناڤخۆیی و ناڤدەولەتی بڕێڤەبچن.