سەرنووچە:

ئەرێ هەرێمبوونا ڕۆژئاڤایێ کوردستانێ نێزیک بوویە؟

12/29/2019 8:04:41 PM
5273 جار خوێندراوەتەوە
عەبدولعەزیز زێباری
+ -

ڕۆژا ٩ێ جۆتمەھا دەربازبوویی ئارتێشا تورکیا و گروپێن گرێدایی وێ یەک ژ مەزنترین شاشیێن بێ چارەسەری خولقاند، دەست بۆ (ھەسەدە) ئانکو یەک ژ ھەڤپەیمان و باوەڕداڕێن ئەمریکا و ھەڤپەیمانیا ناڤدەولەتیا دژی داعشێ ل ڕۆژھەلاتا ناڤەڕاست بر، دەستپێکا ڤان ھێرشێن ژی دەنگڤەدانا مەزن یا جیھانی ل دیف خۆ دا ئینا و چاڤێن زلھێزان ژ گۆڕەپانێن جودایێن جیھانێ بۆ سەر باکور و ڕۆژھەلاتێ سوریا ڤەگوھاستن.

تورکیا و خواستا دووبارەکرنا داگیرکاریا ھەڤئاوایێ عەفرینێ

 تورکیا د تەخمینا وێ یەکێ دا بوو ئەوا ل عەفرین و عەزاز و دەڤەرێن دی دا کری وەسا ب ساناھی ل ھەموو ڕۆژئاڤا بکەت، لێ  لێھاتی و شەھرەزایا ھەسەدێ ئەو خەونە بەرڤاژی کر و بگرە داھاتی و خەونا ئەردۆغان و تورکیێ یا ژ بەرچاڤ ڕوونیەکێ بۆ دووڕیانەکا تاڕی ڤەگوھاست و نھا ئەو بخوە ژی سەری لێ دەر ناکەت.

ھەسەدێ چکریە و چ پێنگاڤ ژ بۆ پاراستنا سنورێ خۆ ھاڤێتیە؟

ھێزێن سوریایا دیموکرات ھەسەدێ، ل دەستپێکا ڤان ھێرشان ژبلی بەڕەڤانیکرنێ، کەفتە دەرگەھـ قوتانا زلھێزێن جیھانێ و  ئاگەھدارکرنا وان ژ چەند پرسان ژ وان ژی، مەترسیا ڕەڤیانا چەکدارێن داعشێ د دەستێ وان دا، ئاوارەبوونا ھەزاران خەلکێ دی، کۆمکژیا سڤیلان و ھتد...، ب ڤێ ژی ولات و بەرپرسێن جیھانێ لسەر ئاستێن جودا ھاتنە سەر ھێل و ب چەندین شێوازان کەفتنە شەرمزارکرن و گەفێن سزاییێن ئابووری و بیاڤێن دی و بگرە گەفێن لەشکەری ژی.

ڕۆژئاڤا چاوا نێزیکی ھەرێمبوونێ بوویە؟

 یەک ژ ژیریێن ھەسەدێ ئەو بوو، کو د ڤان چەند سالێن تەمەنێ دروستبوونا خودا شیا باوەریا خەلکی و گەلێن بن دەستھەلاتا خۆ ب خوە مکۆم بکەت، دەڤەرێن گرێدایی خۆ ژ داعشێ ڕزگاربکەت بپارێزیت و بکەتە پەناگەھەک بۆ خەلکێ لێقەوماوی و دەڤەرەکا ئارام د ناڤ زێدەتری ١٠ سالێن شەڕێ سوریا دا. ھەروەسا بێ ڕاوێژی و بێ فەرمانیا چ ولاتەکێ زلھێزێن جیھانێ نەکر و شێور دگەل ھەموو ولاتان دا کر و ژ پێخەمەت ڕاگرتنا شەڕ و بەربەلاڤکرنا ئاشتیێ ھەموو بەرھەڤی نیشاندان، ب ئاوایەکێ کو ولاتێن جیھانێ ژی ژبەر ھەلویستێن لسەر پشتەڤانیا ھەسەدێ، دگەل تورکیا کەفتنە ھەڤڕکیا داخویانی و تۆھمەتبارکرنا ھەڤدوو ب پشتەڤانیکرنا تیرۆرێ.

ژبلی ڤێ یەکێ ژی ھەسەدێ بۆ پاراستنا دەستھەلاتا خۆ و ھێلانا باندوریا خۆ ل ڕۆژئاڤا، ب لھەڤھاتنا ئەمریکا و تورکیا یا دەڤەرا ئارام ڕازیبوو و پشتی بڕیارا ڤەکشیانێ یا ئەمریکا ل ڕۆژئاڤا ژی ھەسەدێ ب تەمامی پێگیربوونا خۆ ب لھەڤھاتنا تورکیا و ڕوسیا یا لسەر دەڤەرا ئارام ڕاگەھاند و ب ڤێ یەکێ ژی گۆھداریا ئەمریکا و ڕوسیا کر، ئەو دوو ولاتە نەچارکرن، پارێزگاریێ ژ وێ و دەڤەرێن د بن دەستێ وێ دا بکەن.

تورکیا و گەف و ھەڤڕکیکرنا بەرژەوەندیێن ئەمریکا و ئەوروپا و نێزیکبوون ژ ڕوسیا

پشتی ڤان پێنگاڤێن داگیرکاریا تورکیا ل ڕۆژائاڤا و بنپێکرنا یاسایێن شەڕ و پشتەڤانیکرنا چەند گرۆپێن بناڤ ئۆپۆزسیۆن کو ئەمریکا پێشتر ب تیرۆرست بناڤکرنە، ھەروەسا ڕژدیا ڕایەدارێن ئەنقەرە لسەر کڕینا ئێس-٤٠٠ و گەفا داخستنا ھەردوو بنگەھێن لەشکەریێن ئەنجەرلیک و کورجیکی د ناڤ ئاخا خۆ دا کو ئەمریکا و ھەڤپەیمانیا ناتۆیێ نھا بکاردئینن، ب تەمامی ناتۆ و بەرپرس و کۆنگرێسمانێن واشنتۆنێ دلگرانکرنە، ھەر ئەڤ یەکە ژی ئەگەربوون ئەمریکا ل دژی ئەنقەرێ چەند بڕیاران دەربکەت و ژ وانژی پرسا جینۆسایدا ئەرمەنان و بەرێ خۆ بدەتەڤ ڕۆژئاڤا و بەردەوامیێ بدەتە پارێزگاریا کوردان و د نھا دا د گەل حزبێن کوردیێن ڕۆژئاڤا د جڤینان دایە و تەکەزی لسەر یەکڕێزی و پاراستنا وان و دانانا پڕۆژەیەکێ ھەڤبەشێ نوو کریە، کو ب ڤێ یەکێ ژی واشنتۆن دخوازیت پێکھاتەیێن ڕۆژھەلاتا فوراتێ د بن یەک سەیوان کۆم بکەت و ھەرێما ڕۆژھەلاتا فوراتێ ب ئابورەکێ بھێز و ئارتێشەکا سیستەماتیک د کڤانێ سوریا دا دروست بکەت.

سعودیە و میسر کو دوو ھەڤڕکێن سەرسەختێن تورکیانە بەرێ خۆ دانە ڕۆژئاڤا

دگەل ڤان بزاڤێن ئەمریکا د نھا دا ب مەرەما کارێن ئابوری و ھیڤیا جھگرتنا ھەژمونا تورکیا ل دەڤەرێ ولاتێ سعودیێ ھەژمارەک لەشکەر و شەھڕەزایێن بیاڤێ پەترۆلێ یێن کۆمپانیا ئارامکۆ بۆ بەرھەمئینانا نەفتێ د دەڤەرێن بن دەستھەلاتا ھەسەدێ دا بەلاڤکرنە، د نھا دا ژی ئارامکۆ بەرھەڤیا دروستکرنا پارزینگەھێن پەترۆلێ ل دەڤەرێن ڕۆژئاڤایێ کوردستانی دکەت، دگەل ڤێ یەکێ دا ژی ولاتێ میسرێ ژی ھێرشا تورکیایا ل باکور و ڕۆژھەلاتێ سوریا ب دژواری شەرمزارکر و ھۆشداری ب وی ولاتی دان، د کڤانێ ڤەلڤینێن حکومەتا ڕیازێ ژی دا قاھیرەیێ ژی چەند شەھرەزا بۆ بیرێن نەفتێ یێن سنورێ پارێزگەھا دێرەزور شاندن.

د ناڤ ڤان ھەموو تەڤگەر و بزڤان دا، بێدەنگیا ڕوسیا و بێ ھەلویستیا ڕژێما سوریا ھەیە، کو د ڤان داویان دا ھەسەدێ پەیوەندیێن خۆ دگەل وان ژی پێشڤە برینە و ئەڤ بێدەنگیا مۆسکویێ وێ چەندێ ناگەھینیت بێ ئاگەھە ژ ڤان بزاڤێن ئەمریکا، بەلکو د چیتە د کڤانێ  ھەبوونا باوەڕیێ ب ڤی پڕۆژەی و قایل بوون پێ.