سەرنووچە:

سەرۆک وەزیرێ وەلاتیە یان ئاغایێ کەیڤ خۆشکرنا بنەماڵا خۆیە ؟!

7/6/2020 2:43:40 PM
3135 جار خوێندراوەتەوە
ئۆمێد حاجی بەڕۆشکی
+ -

مەسرور بارزانی ئەو کەسێ نھا ھەی و نەییا کوردستانێ ددەستاندا، بەلێ دەستھەڵاتەکا پۆلیسی و چەواشەکاری بڕێکا میدیایا خۆ نھا بڕێڤە دبەت .

دڤان دوو ساڵێن دوماھیێ دا، ب تەمامی ڕەوشا گوزەرانا خەلکێ کوردستانێ، بۆ ڕەوشا ساڵێن ٩٠ــتان ڤەگەڕیایە، و شەڕ لسەر نانی دھێتە کرن، و ھەموو ڕۆژەکێ ل باژێڕەکی ژ ئەگەرێ برسایەتیێ خەلک دھێتە سەر جاددێ .

ئەرێ مەسرور بارزانی و حزبا وی و شریـکا حزبا وی پسیار ژخۆ ناکەن، لسەر ئەڤان ھەموو خێر و خێراتێن سەر ئەرد و ژێر ئەرد و داھاتێ زەبەلاح، شەرمزاریە خەلک ژبەر برسایەتیێ بھێتە سەر جاددێ، ژبەر نەبوونیێ و ھەژاریێ گەنجێن وەڵاتی خۆ بسوژن و خۆ بکۆژن ؟! خێزانێن وەڵاتی ڕێیا مرنێ بگرنە بەر بۆ دەڕبازبوون ژڤی وەڵاتی بڕێیا ئیجە ؟!

پشتی بوورینا ساڵەکێ ژ وەرگرتنا دەستھەڵاتێ ژلایێ مەسرور بارزانی ڤە، و بانگەشەکرن بۆ چاکسازیێ، و چەسپاندنا دادپەروەریێ، و بەڵاڤکرنا خۆشگوزەرانیێ، ھەر چەندە مەسروری بڤێ بانگەشێ دەستھەڵاتا ٢٨ ساڵێن پێشیا خۆ کو پسمامێ وی و بابێ وی سەرۆک ھەرێم و سەرۆک وەزیر بوون، ب شکەستی ل قەلەم دان، بەلێ ئەوی بخۆ ژی چ ژ خالێن ئەوێ بانگەشێ جێبەجێنەکرن، ژبلی زێدەتر ئاڵۆزکرنا ڕەوشا سیاسی، و بەتاڵکرنا بەریکێن خەلکی، و زێدەتر چەواشەکرنا خەلکی . 

ھەبوونا ڕێگریان، باشترین بژاردەیا مەسروری بوویە بۆ جێبەجێنەکرنا کارناما حکومەتا خۆ، و چەواشەکرنا خەلکی، بەلێ نێزیکترین نموونە بۆ ئەنجامدانا چاکسازیان، ئەو سەرۆک وەزیرەیە یێ چەند ھەیڤەکێن کێمە ھاتیە سەر دەستھەڵاتێ، و دناڤ ھەموو ململانێن سیاسی و لەشکەری یێن مەرجیەتا شیعەیان و وەڵاتێ ئێرانێ  گڕۆپێن چەکدار و دناڤ کومەکا حیتان دا، کازمی دەستێ خۆ بۆ ھەستیارترین کەیسێن ڕێڤەبرنا وەڵاتی بر، کو پشتی ساڵا ٢٠٠٣ێ چ کەسەکی ئەو جرعەتە نەکریە، ھەتا گەھشتیە بسەرداگرتنا بارەگەھێن چەکدارێن سەر ب گڕۆپێن شیعەیان ڤە، تایبەت حزبوڵاھـ ! 

پسیار ئەوە، بۆچی کازمی شیا و مەسرور نەشیا ؟ ئەرێ ململانێن سیاسی و لەشکەری و گڕۆپێن چەکدار و مەرجعیەتا شیعەیان و ئێرانێ ل کوردستانێ پترن ژ عێراقێ ؟ بێگۆمان نەخێر، بەلێ ئەگەرێ شیانا کازمی ئیرادا گەلی بوویە و خاستا کازمی و تیما وی بوویە بۆ چاکسازیێن بنەمایی، و نەشیانا مەسروری ژی ژ ئەگەرێ لاوازیا ئیرادەییا ھاوڵاتیان و نەبوونا خاستا دەستھەڵاتێ و تایبەت جووت حزبان بخۆ بۆ چاکسازیان .

لەوان ژی نھا گەھشتیە ڕادەیەکی ھاوڵاتی داخازا ڤەگەڕیان دەستھەڵاتا شیعە مەزھەب بۆ سەر وەڵاتێ خۆ دکەن، جھێ لوومەکرنێ یە، بەلێ خەلکێ حەقە ژ ئەگەرێ دەستھەڵاتا نھا ھەی .

لسەر ئەڤێ ھەموویێ، مەسرور بڕێیا میدیایا خۆ، دھێت چەواشا ھاوڵاتیان دکەت، و لجھێ ھاریکاریا ھەژاران بکەت و چارەسەریان ڕەوشێ بکەت، دکۆشکا خۆ ڤە دەرگەھـ لسەر خۆ گرتیە ژبۆ کو ڕەوشا تەندروستیا وی و خێزانا وی پاراستی بیت، و بۆ خەلکی دیاردکەت کا چەند زمانان دزانیت، و چ دەم دکەتە کەنی ! و ب وی پارێ زەبەلاحێ بۆ ماوێ ٢٩ ساڵایە بخۆ کوومکری ژیانا خۆ و ماڵباتا خۆ ب شاھانە دبورینیت .

ئەڤە ژی دیاردکەت مەسرور بارزانی سەرۆک وەزیرێ وەڵاتی نینە بتنێ ئاغایەکە بۆ دابینکرنا کەیڤ خۆشیا خێزان و ماڵباتا خۆ لسەر داھاتێ وەڵاتێ وێرانکرنی لسەر دەستێن حزبا وی و شریکا حزبا وی .