سەرنووچە:

ل ڤێدەرێ ھاوکێشە ب تەمامی بەروڤاژی یە، کۆرۆنا ژی نموونە

5/1/2020 9:17:14 PM
6120 جار خوێندراوەتەوە
لەیس حسێن گرعزێری
+ -

بەلاڤبوونا ڤایرۆسێ کۆرۆنا COVID-١٩ و زێدەبوونا مەترسیا ڤی ڤایرۆسی ل ھەرێما کوردستانێ، وەکر کو حکومەتا ھەرێمێ رێکارێن توند بگرێتە بەر ژبۆ رێگریکرنێ ل زێدەبوونا ڤایرۆسی و ھەر زوو و لپێش کو بگەھتە ھەرێمێ ژی رێنمایێن ساخلەمیێ بەلاڤکرن و ل پشت را ژی قەدەغەیا ھاتنوچوونێ و گرتنا بازار و جھێن گشتی راگەھاند.

رۆژ بۆ رۆژێ رەوش ل تەڤاھیا وەلاتێن کو ڤایرۆس لێ پەیدابووی بەرەڤ ئالۆزیێ دچوو و ئامارێن ساخلەمیێ یێن ژ وان وەلاتان دھاتنە ئاشکەرا کرن د ترسناک بوون، لێ خوەشبەختانە ل ھەرێما کوردستانێ و عیراقێ ب ئاوایەکی گشتی رەوش ھندە ئالۆز نەبوو.

سەرەڕای کو ب بریارا قەدەغەیا ھاتنوچوونێ و گرتنا بازار و جھێن گشتی ھژمارەکا زۆر یا وەلاتایان بێ کار مان و زەرەرەکا زۆر ب وان کەفت بەلێ ب ئاوایەکی باش و سەرتاسەری پێگری ب رێنمایێن ساخلەمیێ و رێکارێن حکومەتێ ژئالیێ وەلاتیێن ھەرێمێ و ھەروەھا ئاوارە و پەنابەرێن ل ھەرێمێ دژین ھاتە کرن.

پشتی ھەیامەکی گەلەک کێم و شوکر ژ خودێ کو رەوش ھەتا رادەیەکی باش لێ ھات و ھژمارا چارەسەربوویان ژ ڤی ڤایرۆسی ژ توشبوویان زێدەتر لی ھات، لێ زۆر مخابن ب شاشی ڤە ئەڤ چەندە ھاتە وەرگرتن و ھەر زوو ھژمارەکا جھـ و دوکانان ھاتنە ڤەکرن بێی کو ھزر ل ئەنجامی دا بھێتە کرن.

ب ئەڤێ ژی نە راوەستیان و براستی ژی خەلکێ ھێدی ھێدی دەست ژ پێگریکرنا رێنمایان بەردا لێ دڤیابا ل وی دەمی حکومەت رێکارێن توندتر بگریتە بەر دا کو ب تەمامی ڤایرۆس بھێتە کۆنترۆل کرن ق جانێ وەلاتیان ھەر پاراستی بمینە، لێ ل جھێ ڤێ یەکێ پێشنیارا ئاھنگا سەرکەفتنێ ل دھۆکێ ھاتە دان و ھەر ژ وێ دا ئێدی پێگری کرن بوو وەک خەون.

ژ وی دەمی و وێ ڤە ئێدی ھەر تشت ب سەرێ خوە ئاسایی بوو و قۆناغ بەر ب قۆناغ ژیان ئاسایی کرن و ئاھنگ ژی وەک دێ بێژی کۆرۆنا ل جیھانێ تەڤاھیێ نەما وەھا گێران و کەیف کەیفا خەلکێ بوو و ب شاشی و تێگەھشتنا شاش و ژ ئەنجامێ ڤێ بریارا نەیا دروست ھژمارا وان کەسێن کو ب ئەگەرا گولە و ئالاڤێن ئاھنگ پێ ئەنجامداین ب شاشی ژ ھژمارا توشبوویان ب کۆرۆنا ل پارێزگەھا دھۆکێ یان پتر بوو یان ژ ھندی وێ بوو، ئەڤە ژی ژ ھزرا شاشا ئیدارا دەڤەرێ و خەلکێ بوو کو وەک وان دگۆت ب مەرەما سوپاسیکرنا ھێزێن ئەمنی و تیمێن ساخلەمیێ بوو لێ زۆر مخابن و بەداخەوە کو ھاوکێش ب تەمامی بەروڤاژی لێ ھات و ھژمارا توشبوویان ژی ھەر دچە دیسا زێدەتر دبە و مەترسیا ڤایرۆسی ژی ھیش یا ل گۆپیتکێ یە، و ھەر وەکو رێکخراوا ساخلەمیا جیھانی ژی ل پتریا لێدوانێن خوە دا خوەیادکە کو مەترسی ھیش یا ل قۆناغەکا تەمام ب زەحمەت دایە و ڤایرۆس ژی دێ دەمەکی درێژ دگەل مە مینت.

گەلەری