سەرنووچە:

ناسیونالیزم و عەقلێ عەشیرەتگەرییا کوردی

12/12/2019 7:21:09 PM
16969 جار خوێندراوەتەوە
جاسم سەبرى
+ -

کوردستان ئەو مەسکەنێ دقوناغێن سەخت و دژوار دا دەربازبوویی، پشتی چەندین ئەنفال و دەربەدەری و کومەلکوژی و سەرھلدان و شورەشێن چەکداری و ئەزمونا ٢١ سالیا دەستھەلاتداریا کوردی و دەربازبوونا پروسیسا ریفراندومێ و ڕویدانێن ھاتنا شەرێ داعش و ڤەحواندنا ھزارەھا ئاوارا و تا ڤێ کابینا حکومەتا کوردی یا نھا، ئەم بەردەوام یێ خەباتێ ژ پێخەمەت ئاڤاکرنا کیانەکێ سەربەخویێ کوردی دکەین ل باشورێ کوردستانێ و بەردەوام بەرێ مەیێ ل دەستەکێ فریادرەس ئالایێ مەیێ رەنگا و رەنگ دناڤا ئالایێن دەولەتان دا بلند بکەت و دەولەتەکا بێ ئاریشە و خوەدی سنور و سەروەری لڤێ رۆژھەلاتا میراتە بومە گەلێ کورد دامەزرینت، ل دوماھیا ئەڤێ خالێ ھەردەم پرسەک خوە دسەپینت بێکو بەرسڤەکا رازیکەر لێ بیتە خوەدان، ئەرێ گەلو بۆ ئەڤێ ئەزمونا ھندە مەزن یا ئەم ھەردەم چاڤەڕێ مەشیایە مرۆڤێ کورد ئاڤا بکەین بیروباوەرێن وی وەک یێن سیاسیێ فەرەنسی (ژان ماری لوپێن) ـی بن دەما گۆتی " من گوندێ خوە ژ ھەموو گوندان خوەشتردڤێت، من باژێرێ خۆ ژھەموو باژێران خوەشتر دڤێت، بەلێ فەرەنسا د سەر ھەموو تشتەکێ دایـە " ، ھەردەم جھێ گومانێ یە دڤی تەڤنێ ئالوزێ فرە ئولی و فرە نەتەوەیی و ناوچەگیری و عەشیرەتگەری و فرە حزبی دا مە شیایە ئەم ئەڤی تێکستی بکەنە بیرۆباوەرەکا ڤەبڕ لدەف تاکێ کورد کو " نەتەوە ژ پارت و ھوز و کەس و ڕەگەز و ناوچە و پلە و پوستان مەزنترە ، گرنگترە ، پیروزترە.

سەرکردە و سیاسیێ ئیتالی (ماسیمو Massimo)ـی پرسەک ئازراند و کرە پروژەکێ ستراتیژیێ ئیتالی دەما گوتی "مـە ئیتـالیایەک ئازاد دامـەزراند، نوکە دەمێ ئاڤاکرنا مرۆڤێ ئیتالـی یـە ".

پرس لڤێرێ ئەوە گەلو کەنگی دەمێ ئاڤاکرنا مرۆڤێ کوردی یە و کەنگی ئەڤ پرسە دێ کەڤیتە بوارێ جێبەجێکرنێ و کەنگی ئەمێ کار لسەر ئاڤاکرنا مرۆڤەکێ ناسیونالیزمێ کوردییێ ڕاستەقینە کەین ..؟.

بێگومان ھەمی بەرسڤ دێ نەخێربن، چونکی چەندین فاکتەرێن سەرەکی ھەنە ببنە ھوکارێ دووبەرەکی و نەڤیانێ دناڤبەرا ھەڤوەلاتیێن کورد دا ل ئاستن ببنە ئەگەرێ ھندێ مە کەیف ب شکەستنا ئێک و دوو بھێت.

مینا حزبیکرنا دەڤەر و ناوچەیێن کوردی و دیارکرنا ڕویێ دووئیدارەیی یا ھەرێمێ و حزبیکرنا سالیاد و بیرەوەریێن نەتەوەیی بلندکرنا ئاستێ حزبی تا وی ڕادەیی لایەنگر و ئەندامێن حزبی ل شوینا ھەڤرک ب چاڤێ خیانەتکار و وەلات فرۆش ئێک و دوو ببینن، نەبوونا کەنال و بەرنامەیێن نەتەوەیی و ڤەکرنا سەدان رۆژنامە و گوڤار و تیڤیێن سیبەر بۆ ململان و پروپاگەندا حزبی و قوتنەکرنا دەستێ حزبی دناڤا کاروبارێن حکومی و نەبوونا ئارتێشەکا ئێکگرتی و نیشتیمانی و ھتد ... ئەڤە ھەمی ئەو فاکتەریێن بھێزن دبنە ئەگەرێ دووبەرەکیا ناڤمالییا کوردی و لاوازکرنا ھەستێ نەتەوەیی و ناسیونالیستی دناڤا تاکێ کورد دا.