سەرنووچە:

ئێدێ دڤێت گومانێ ژ مرۆڤبوونا خۆ بکەین!

5/9/2021 9:02:52 PM
3349 جار خوێندراوەتەوە
عەگید سەلیم
+ -

ئەگەر بێ کەرامەتی تشتەک بیت مرۆڤی بکەتە بوونەوەرەکێ پارچەپارچە و وێرانکری، وی دەمی کەرامەت ئەو تشتەیە کو وان پارچە و لەشێ وێرانکری کوم ڤەدکەت و جارەکا دی دکەتە مرۆڤ. ئەڤە تێگەھشتنا دەرونناسەکێ ئەمریکی یە دەربارەی تێگەھێ کەرامەتێ.

دڤی کەڤانیدا دا سەدێ بیستێ وەک سەردەم و قوناغەک پر مەترسی ژ ئەنجامێ سیاسەتا داگیرکرنێ و قرکرنێن ھەمبەری گەلێ مە ستراتیژوجەوھەرا پڕۆسێن داگیرکرنێ دروستکرنا تاک و جڤاک و رەوشەکا سەپاندی، کو تێدا نرخ و بھایێ ھەری ڤالا و بێ ھێز کەرامەت بوو.

ئەو ھێز و کەسایەتیێن دگەل دوژمنان بووینە بەشەک ژ خیانەت و شەروشەرمزاری و مالوێرانیا کوردان، تا رادێ بەشداربوونێ د پرۆسەیێن ئەنفال و تاوانێن جودا جودا دگەل نەتەوا خۆ! 
ب ئاوایەکێ دیار گەھشتنا وی مرۆڤی بوو ب گوپیتکا ڤالابوونا بھایێن ئەخلاقی و ویژدانی و پارچەپارچەبوونا کەسایەتیا وی و ڤالابوون ژ کەرامەتێ.

تێگەھێ کەرامەتێ د فەلسەفا ئەخلاقیا ئیمانوێل کانت دا خوەدی گرنگیەکا زۆرە ،کانت دبێژیت ھەر مرۆڤەکێ بشێت یێ ئازاد بیت و خودان عەقل و ھزرکرنەکا سەربخۆ بیت، ئەو مرۆڤ مرۆڤەکێ خودان کەرامەتە!

دڤێ پێناسا کورتا کانت بوو کەرامەتێ تێگەھێن ئازادی و عەقل جھەکێ گرنگ د بەرێ خوەدانا کانتی بوو مژارا کەرامەتێ دگرن.

ھەلبەت ئەزموونا حوکمرانیا کوردی ل زور ئالیانڤە درێژەپێدەرێ سیاسەتا داگیرکەرێن کوردستانێ بوو ژ بوو شکاندنا کەرامەتا مرۆڤێ کورد و سیھ سالێن ئەتەککرن و یاریکرن بوو ب ئازادی و خەون و ھەست و عەقلێ مرۆڤێ کورد.

چیرۆکێن تراژیدیێن شەرێ براکوژیێ و تیرۆرا سیاسی و رۆژنامەڤانی و برسیکرنا خەلکی و ب کارتونیکرنا دام و دەزگەھێن حوکمرانیێ...ئەزموونا شەقلێدانا ئازادیێ و عەقلێ مرۆڤێ کورد بوو.
جڤاکەک ل سەدێ بیست و ئێکێ بازرگانێن وێ یێن سیاسی ئاستێ تەماعیا وان بچیتە پارێ زارۆکێن پەنجەشێرێ و مووچێ ئەنفال و زارۆکێن شەھیدان و تژی گەری و زکێ ڤی خەلکی دەرمان و خارنێن ئێکسپایەر بیت...

ژبلی کو شێواز و فورمێ دەستەلاتداریێ فورمەک مافیگەری و چەتەگەریێ بخوەڤە دبینیت، د ھەماندەمدا جڤاک و تاکێن ل بن سیبەرا حوکمرانیەک بڤی ئاوای د کەڤنە ھەمبەر پرس و گومانێن مەزن!

د ھندەک دیاردە و بوویەران دا مرۆڤ دکاریت بێژیت ئەڤ جڤاکە نە ل سەدێ بیست و ئێکێ دژیت و ھەمان نرخ و بھایێن جڤاکێن سەدێن تاری تێدا زاڵەو ئەڤ جورێ بەلاڤکرنا وێنان دگەل بەرپرسان و ئاغایێن سیاسی و گەرمکرنا مەدح و پەسن و سوپاسگوزاریان و ھەویێن پیرۆزبایی لێکرنێ و پرۆسەیا خوەنمایشکرنێ و گەرمکرنا بازارێ مەلاقیێ و کوێلایەتیێ، نە ب تنێ ل سەر ئاستێ تاکێن سادەیێن ڤی ولاتی بەلکو وەک بەختیار عەلی دبێژیت جەھل ئەڤرۆ د ناڤەندێن جودا جودایێن مەدا حزۆرەکا ب ھێز ھەیە و ب مخابنیڤە ھژمارەکا مەزن ژ ب ناڤ رەۆشەنبیر و رۆژنامەڤان و رێڤەبەر و ماموستا خۆ دناڤا ڤی خێما جەھالەتێدا خۆ بەندکریە!

ل دوماھیکێ داکو جڤاک روبەرەکێ بەرفرەھ بۆ بھێز ئێخستنا تێگەھێ کەرامەتێ فەراھەم بکەت، پێتڤی یە ژینگەھەک بھێتە ڕەخساندن کو مرۆڤ ب ئازادانە مومارسا ئازادیا خۆ و ب کار ئێنانا عەقل و ھزرکرنا خۆ بکەت. نە ئازادی دبن سیبەرا حوکمەک بڤی ئاوای دا پەیدا دبیت، نەک تاکەک عەقلانی ب سوپاسگۆزاری و خوەدی مەیلا کوێلایەتی و سەرھەژاندن و دەستقوتانێ دروست د بیت، لێدان ل ئازادیا مرۆڤی و یاریکرن ب عەقلێ مرۆڤی لێدانە ل کەسایەتی و کەرامەتا مرۆڤی.