سەرنووچە:

یەکێتی حکومەتە یان ئۆپۆزسیۆن و چ دڤێت؟

12/30/2020 7:46:27 PM
2495 جار خوێندراوەتەوە
بێوار دوسکی
+ -

د سالێن جودایێن دەربازبوویی دا و ل دەمێ ھەبوونا مام جەلال، یەکێتیێ ب ئێک ڕووی کار دکر، ڤێجا چ دز چ باش یان خوینڕێژ یان دەستپاقژ، لێ د نوکە دا ژبلی کو سیاسەتا نەزەلالا یەکێتیێ ژیانا خەلکی خرابتر لێکریە، بگرە پتریا بەرپرسێن وێ حزبێ ژی ئاراستە و ئارمانجا سیاسەتا حزبا خۆ نزانن.

گرتنە دەستا جومگەیێن ھەستیارێن یەکێتیێ ژ لایێ ھند کەسێن ناڤ وێ حزبێ دا نێرینا ناڤخۆی و دەنگێ نەڕازی تێدا زێدەکریە و جەماوەرێ وێژی بێزار و دلگران کرینە، ژبەرکو د نوکە دا دەستێ وێ حزبێ پتری ھەر دەمەکێ د دزیێ دا ھەیە و د ھەمبەر دا خۆ شەریف دکەت، دەست د قاچاخچیەتیێ دا ھەیە و ژ لایەکێ دیڤە خۆ لێ بەری دکەت.

خەلکی ھانددەت خۆنیشاندانان بکەن و بناڤێ ئازادیێ و پارێزەرێ مافخواریان دخوریت و ئەو بخۆ خەلکی دکوژیت و دەستەسەر دکەت و دڕەڤینیت.

پیەکێ وێ د حکومەتێ دایە و شەڕی بۆ بدەستڤەئینانا پۆستێن حکومی و پشکا خۆ یا پارەی و بودجەی دکەت، پیەکێ دی ژی ل دەرڤەیی حکومەتێ بۆ بەشەکێ سەرکردایەتیا خۆ تەرخانکریە کو کار بۆ شکاندن و شکەستن پێئینانا حکومەتێ بکەن.

خۆنیشاندانێن ڤێ دۆماھیکێ یێن زوونا کەسک گەواھیدەر و بەلگەنە لسەر نێرینا من کو ئەڤ نەزەلالیە سیاسەتا یەکێتیێیە، چاوا؟، ژبەرکو ل دەما دەستپێکرنا خۆنیشاندانێن ڤێ دۆماھیکێ یێن وێ زوونێ ھەڤسەرۆکەکێ وێ حزبێ پشتەڤانیا خۆنیشاندەران کر و خۆ ب ھەڤدەنگێ وان نیشاندا، ھەرچەندە پتریا دەزگەھێن ھەستیارێن ئەمنیێن وێ حزبێ ژی ب فەرمانا وی ھەڤسەرۆکی دھێنە لڤاندن، لێ دیاربوو ھەر ھێزێن ئەمنیێن بن ڕکێفا وی ڕژیانە سەر جادەیان و ب تەقەکرن و کوشتنا وەڵاتیان و دارکاریێ خۆنیشاندەر بەڵاڤەکرن و دۆماھیک پێ ئینان ژبلی کو ب سەدان کەس دەستەسەرکرن، ھەروەسا ژبلی کو ھەتا ڤێگاڤێ ژی گومانەک دھێتە بەحسکرن کو ھند کەسێن ئاراستەکری ژی ھنارتبنە ناڤ خۆنیشاندانێن وەڵاتیێن خێر لخۆ نەدیتی بۆ تێکدانا مولکێ گشتی و حکومی ھەروەک ل گەلەک باژێڕان ئەو ئارمانج ھاتە پێکئینان و چەندین ئاڤاھیێن حکومیێن کو کاروبارێن ڕۆژانەیێن وەڵاتیان بڕێڤەدبرن سوتن.

بەشەک ژ سەرکردایەتیا نوکەیا یەکێتیێ بۆ ھەڤڕکی کرن و شکاندنا حکومەتێ و ڤێ کابینەیێ بزاڤێن نە دخزمەتا خەلکی دا دکەت و بۆ وێ گرنگ ژی نینە کا چ ڕوودەت، ژبەرکو ئەو دخوازن تەسفیە حسابێن خۆ یێن شاشیێن ١٦ێ ئۆکتۆبەرێ یان ھەر ژ دەستدانەکێ دگەل لایەنێ ھەمبەر دا کو پارتی و سەرکردایەتیا وێیە بکەن، لێ لسەر حسابا خەلکی.

لەو دبێژم، ئەڤا یەکێتی دکەت پاقژی نینە و سیاسەتا ڕەوا و ئێک ڕووی ژی نینە، د خزمەتا خەلکی و ڤێ قەوارەیێ ژی دانینە، گەر ڕاستە خەمخورە و د بەرەیێ گەلی دایە فەرموون ژ حکومەتێ دەرکەڤن و وەرن خزمەتا خەلکی ب شێوازەکێ ئێک ڕووی و ڕاست بکەن.

ڕاستە حکومەتێ کێماسی ھەنە، لێ چنەبیت ئەم ڕوویێ حکومەتێ دبینین و دزانین چاوایە، لێ یەکێتیا خودان ھەزاران شەھید و تەمەنەک ٤٥ سالی، شنی دھێت بۆ تەسفیەیێن خۆ یێن شەخسی خەلکی و زوون و ساسیەت و خەبات و خویانا شەھیدێن خۆ دکەتە قوربانی و بۆ ئارمانجەکا بەرتەسکا خۆ چ ڕووبدەت بۆ وێ نەخەمە.